首頁 arrow 綠色短評 arrow 中國koh展出伊的橫霸面!

中國koh展出伊的橫霸面! PDF Print E-mail
Written by 李南衡   
Friday, 15 December 2017

2017十二月十二,美國總統Trump佇白宮簽署「2018財政年度國防授權法」(NDAA FY2018)生效,chit項有懸kah七千億美金的國防預算法內底,有真濟附帶條款,美國國會想beh藉由通過預算法案kah相關的決議kah意見,來表達國會的看法,但是大多數的附帶決議的進行,上蓋關健是白宮的態度。

咱khah關心的是列佇第1259條有關「強化美台防務關係」,其中有七項對美國行政部門並無強制力的「國會意見」,咱上蓋關注的包括:邀請台灣參與紅旗軍演,kah考慮重開美台海軍軍艦停靠的可行性kah可能性。白宮隨後有公布 Trump總統的聲明講,行政部門看待chiah-ê條款,tio̍h愛會tàng kah作為三軍統帥享有憲法賦hō總統的專屬權一致。意思是講伊無抵抵攏照按呢執行。   Tī美國總統Trump簽署「2018財政年度國防授權法」前兩工的十二月初十,中國駐美國公使李克新,佇華府邀請中國留美學生,華僑kah媒體參加講座,名義上是報告中共十九大成果kah美國總統Trump訪問中國的狀況。真正的用意是事先「放毒」,講伊有kā美國國會議員講,美國若派軍艦進入台灣的港口,中國的《反分裂國家法》tio̍h會啟動,「美國軍艦入到高雄港hit日,tio̍h是中國解敦軍武力統一台灣的時。」Khah奇怪的是,chit位公使m̄知是向幾十位國會議員講的,七月十四眾議院通過、九月十八參議院過過chit-ê「國防授權法」,參議院會議八十九票贊成、八票反對。是按怎美國國會議員那會無teh kā伊「信到」?   咱台灣mā是誠有撙節,講因為台灣國際處境有khah特殊,咱tio̍h khoaⁿ-khoaⁿ來,會tàng ùi khah無政治敏感、像講人道救援的議題優先。雖然咱國對未來軍艦互訪的可行性,對咱國未來軍購、軍演有期待的項目,但是咱軍方人士攏無隨便發表意見,干單講「尊重美國政府的評估kah執行方式。」咱mā有佇新聞媒體頂面,看tio̍h兩台美軍F-18戰鬥機,特別有文字說明講:2015年四月降落佇台南空軍基地。伊的用意可能是beh撞破中國駐美國公使李克新、kah中國共產黨機關報《環球網》的雞歸。有時kā想起來mā無一定tio̍h按呢。   中國共產黨機關報《網球網》tòe中國駐美國公使李克新的話尾講:武力統治台灣m̄是威脅,是歸個中華民族的決心kah意志。Koh講阮雖然疼惜台灣、愛台灣,但是台灣若是ho͘美國軍艦入港、舞「統獨公投」、改國號。阮tio̍h會用武力解放台灣、甚至會kā台灣毀滅掉!按呢中國敢m̄是若像一個m̄ 成人,追求一位小姐愛be-tio̍h,講別人免想beh愛伊,tio̍h kā hit位小姐毀容甚至刣死!    咱koh一遍看tio̍h中國展出伊的橫霸面!
 
< Prev   Next >