首頁 arrow 綠色短評 arrow 愛國有罪嗎?

愛國有罪嗎? PDF 列印 E-mail
2009/03/06, Friday
        清國時代第二次英法聯軍佇北京圓明園搶去e5個銅製e5貓鼠頭及兔頭,無插中國政府e5阻擋,ti7二月二六,兩個以歐元三千一百四十九萬拍賣出去。Khah戲劇e5演出是hit個神秘買主是「中國搶救流失海外文物專項基金收藏顧問」蔡銘超,三月初二暴露家己e5身份,而且講「chit條錢我be7付!」

        馬上引起中國國內熱烈e5討論,甚至隨時有人做民意調查,講有七成以上的網友贊成蔡銘超e5作法,有真濟人阿佬伊是「愛國者」,講是ka7中國人e5面子爭取倒轉來,凡若考慮tioh8中國人e5自尊及感情e5人,攏ma7會大大ka7伊阿佬!有人講對付法國chit種土匪強盜,當然ma7 tioh8用小人e5步數。有人講,強盜ka7咱搶去e5物件,是按怎咱tioh8 koh用錢ka7買倒轉來?che那像綁匪掠人去了後要求贖款,全世界攏ma7知影無必要付錢hou7強盜,若付錢hou7強盜就是teh鼓勵強盜e5行為。

  當然ma7有一寡khah有理性e5人,認為既然法國法院已經允准佳士得拍賣行拍賣,佇法國就是合法,也就是講chite5拍賣完全符合法律程序。蔡銘超按呢做,就是teh挑戰法律及社會誠信。

  馬上tioh8有人反駁講,中國人是愛好和平e5民族,「人無侵犯我,我就無侵犯人。」應該tioh8發動全國人民拒買法國貨,抵制「家樂福」之類法國商店。親像兩冬前修理日本人抵制日本貨按呢。tioh8假那有影咧!借問一下,咱台灣tang時去侵犯tioh8中國,是按怎中國tioh8安裝一千五百粒飛彈向咱台灣?今年二月十四,一台中國貨船佇公海hou7俄羅軍艦炮擊沈去,十個中國船員失蹤七個,敢有聽中國人哼一聲?中國人明明tioh8是軟土深掘、看人teh soah油。

    Koh khah濟中國人講對付無恥e5強盜土匪,用什麼光明正大e5方法攏是無效甚至是愚戇e5行為,蔡銘超chit種做法,舞kah法國政府及佳士得拍賣行攏無伊法,che ma7tang3看出中國人聰明e5所在。中國人上愛掛佇嘴唇皮e5就是「愛國」,若moa tioh8「愛國」e5外衫,啥物歹代誌ma7會使做,那無,中國beh那會有「文化大革命」hithiahhiah無人性e5代誌發生?

  Che ma7 hou7咱想起三十冬前,美麗島雜誌創刊酒會依法申請佇中泰賓館舉辦,外口非法聚集一堆「疾風集團」e5theh石頭去khian參加酒會e5人。警察放目hou7 in亂舞。有人指責in違法,in應講:「愛國有罪嗎?」中國國民黨及中國共產黨che兩個雙生仔黨無seng5免錢,上愛那喝愛國那做歹代誌。英國學者Johnson博士兩百外冬前就講過:「愛國是流氓最後e5藉口!」
 
< 前一個   下一個 >