首頁 arrow 綠色短評 arrow 讀冊人的品

讀冊人的品 PDF Print E-mail
Written by 李南衡   
Friday, 22 December 2017

作囝仔的時陣,阮老父教阮用台語讀《昔時賢文》、《神童詩》之類的冊,阮準作唸冊歌,啥物「知人知面不知心」、「海枯終見底,人死不知心」攏唸kah誠趣味致使無啥壓力。有一遍唸tioh「萬般皆下品,惟有讀書高」的時,問阮老父那會按呢講?

伊解說講,人因為讀冊tio̍h會bat khah濟作人做事的道理,久來tio̍h會改變氣質,氣質好起來人品tio̍h會懸。我問講有人冊讀愈濟,做歹代誌顚倒愈大條愈奸巧。阮老父應講hit種人讀冊讀佇尻脊骿。當時並無問阮老父「讀冊讀佇尻脊骿」是啥意思。大漢以後才知影並m̄是「萬般皆下品」,當然mā m̄是「惟有讀書高」。   人好bái to̍h真歹分,何況是詩。有的詩甚至有時會hông懷疑he敢會使叫作「詩」?像講最近過身的余光中當年寫的悼念蔣經國的詩〈送別〉:(我kā改作台語)悲哀的半旗/壯烈的半旗/為你來降/悲哀的烏紗/沉重的烏紗/為你來帶(tòa)/悲哀的菊花/純潔的菊花/為你來開/悲哀的靈堂/肅靜的靈堂/為你來拜/悲哀的行列/依依的行列/為你來排/悲哀的目屎/感激的目屎/為你來流/悲哀的背影/勞累的背影/無koh越頭/悲哀的靈車/告別的靈車/khoaⁿ-khoaⁿ-á行/親愛的朋友/辛苦的領袖/khoaⁿ-khoaⁿ-á行。李敖看bē做得,學伊按呢寫:悲哀的馬屁(bé-phùi)/臭臭的馬屁/為你來拍(pah)/悲哀的新詩/無恥的新詩/為你來寫/親愛的朋友/辛苦的領袖/khoaⁿ-khoaⁿ-á行/傷緊我tòe bē-tio̍h/因為我是你的狗。李敖bat按呢評價余光中講:伊的文比伊的學khah懸,伊的學比伊的詩khah懸,伊的詩比伊的品khah懸。   千萬m̄-thang因為余光中chit-ê人to̍h感慨:「文人無品」。事實上,台灣有「品」的讀冊人猶真濟。舉一個例來講:十二月十六,罷免立法委員黃國昌投票日的前一工,馮光遠佇伊的面冊按呢寫:昨昏(拜四)的「夜深人未靜」,我訪問了我家己,講起明仔載(拜六)tio̍h beh舉行的罷免案。我的觀點真簡單,設使是因為反對同志平權、抑是多元成家,來罷免黃國昌,我是絕對tio̍h徛出來反對。另外,安定力量kā伊退黨chit件代誌,講作是因為「時代力量背離民眾的聲音」,馮光遠認為是誠下流的行為。咱攏知影,馮光遠kah黃國昌兩位攏是「時代力量」創黨的同志,今年初馮光遠有kah黃國昌意見bē合起衝突變面,馮光遠宣布退出時代力量。Tī beh投票罷免黃國昌的前一工,馮光遠跳出來拜託新北市十二選區的民眾,tio̍h去投反對罷免黃國昌一票。Che是何等高尚的人品ah!   世間各種人的品有百百種,讀冊人的品mā是按呢。
Last Updated ( Friday, 22 December 2017 )
 
< Prev   Next >