首頁 arrow 綠色短評 arrow 戇人市長講beh起懸牆

戇人市長講beh起懸牆 PDF Print E-mail
Written by 李南衡   
Friday, 29 December 2017
十二月二五,台北市長柯文哲執政滿三周年,hit早起舉行記者會,同時場外猶koh有抗議。柯文哲承認動用警察保護teh損耗警力,伊講已經請市警察局長kah中央參詳,像講行政院、立法院等機關的牆圍仔是是會使起khah懸,才tio̍h保護牆圍仔警察當作人肉盾牌。 柯市長話講完,隨時有社運團體指出,台北市抗議濟,柯文哲市長beh建議kā政府機關攏起懸牆,m̄-nā bē tang解決問題,顚倒加深人民kah政府之間的不信任kah猜疑。Beh建議起懸牆,不如開大門,hō͘公共政策公開透明化。台灣水資源保育聯盟發言人陳淑樺表示,柯文哲一定m̄-bat抗議過,無了解抗議的人的需求。伊建議柯文哲先去了解人民為啥物會去抗議,m̄是先討論按怎起懸牆,che m̄是民主政治的好表現。地球公民基金會顧問蔡中岳表示,若beh起懸牆不如kā門拍開,因為政策若公開透明,hō͘社會討論,tio̍h bē有hiah濟陳情抗爭。無論牆起諾懸,有心的人猶原會想孔想縫入去,而且kā人民擋佇外面,kah封建,威權時代有啥無仝?伊講,透過民主機制選出來的首都市長,準若連chit種基本概念都無, hō͘人相當失望。   失望作你失望,十二月二六柯市長參加內湖行動市政會議了後,記者訪問伊的時講,反勞基法修法遊行hit工,耗損超過三千警力,ùi早起到半暝。警察已經thiám kah擋bē-tiâu,網路mā有警方khioh怨的聲音。Hit工檢討會用khah精確的字眼應該是「物理阻隔」,伊講m̄是起像監獄hit種懸牆,是親像張榮發基金會的牆圍仔hiah好看。若是tēng體改善,會tàng減少警力,伊猶原支持。   看tio̍h chit款的柯文哲市長,hō͘咱數念起另外一位台北市長高玉樹,伊第二遍當選台北市長的前一年、1963年九月十一,有超級強烈的風颱葛樂禮(Gloria)(m̄是1996年仝名hit粒),帶來車桶倒的大雨,加上石門水庫起好了後頭一遍洩洪,koh抵tio̍h大流水、海水倒灌,台北盆地包括三重蘆洲台北市上淒慘,浸水浸三工。台北市日新國小附近水淹一樓懸。所以高玉樹市長六月初二就任,台北市議會tio̍h建議沿淡水河岸的堤防懸牆tio̍h加起khah懸。高玉樹市長堅決反對,kah議員輪番辯論。伊講,若是逐遍淹大水tio̍h kā懸牆koh起khah懸,有一工各位會看tio̍h咱台北市的堤防懸牆抵天。咱要緊的是按怎清理淡水河kah kā台北市的排水溝做hō͘好。議員才無koh堅持。   古早tio̍h有人kā人民比作水。五十年前台北市出一個有智慧的高玉樹市長反對用懸牆擋水,今仔日出一個戇人市長講beh起懸牆擋人! (171229)
 
< Prev   Next >