首頁 arrow 綠色短評 arrow 中國國民黨賊khah惡人!

中國國民黨賊khah惡人! PDF Print E-mail
Written by 李南衡   
Friday, 05 January 2018
舊年(2017)三月底,「不當黨產處理委員會」原本beh先針對中國國民黨取得日產進行聽證,才來認定是m̄是應該移轉作國有抑是追徵價額(有的物件已經賣掉抑是移轉他人,tio̍h照估價追徵原本的價值)。 中國國民黨早一步tī前一工,由該黨行管會主委邱大展kah委任律師張少騰召開記者會強調,hit當時取得的日產「轉數」於法有據,是百分之百的合法財產,因為完全是根據訓政時期國防最高委員會的決議,而且chiah-ê決議到taⁿ猶koh有效。   咱實在m̄知當頭白日有人hiah gâu含眠teh講siáu話。咱攏知影,第二次世界大戰後,遠東盟軍總司令麥克阿瑟(Douglas MacArthur)命令中國戰區總司令蔣介石作台灣佔領軍司令,十月二五蔣介石派陳儀代表聯軍佇台北公會堂接受日本軍投降,會場掛中美英法蘇五國國旗,你tio̍h知影m̄是中國國民黨政府所講的中華民國來「光復台灣」。後來麥克阿瑟受命擔任美軍駐在日本最高司令,伊並無kā日產變作美國政府的財產,抑是kā部分日產「轉數」變作美國共和黨的黨產。1952年四月二八《舊金山和約》生效了後美軍tio̍h結束佔領、完全撤離日本國土:那像1945年五月初八德國向盟軍投降了後,盟軍kā德國分作美、英、法、蘇四國佔領區,1949年五月二三由美、英、法佔領區合併成立德意志聯邦共和國、咱講的「西德」,仝hit年十月初七蘇聯佔領區成立德意志民主共和國、咱講的「東德」。連hit當時拗蠻橫霸無比的蘇聯mā m̄敢佔咧m̄走!無親像蔣介石hiah呢bē見笑,台灣佔咧tioh m̄走講是台灣光復,mā無親像中國國民黨hit款賊目賊手看tio̍h好物件tio̍h kā「轉數」霸佔作家己的。    咱會提起舊年的代誌,是因為今年正月初二,中國國民黨koh講該黨取得佇台灣的日產,是政府「轉數」作中國國民黨對日抗戰期間的戰爭損失賠償,並m̄是「撥用」。笑死人,中國國民黨tī對日抗戰期間的損失,kāng咱台灣tī-tāi?中華民國軍隊當時是盟軍委派來台灣的佔領軍,連佔領軍tī佔領期間都無權霸佔佔領地區的任何建物抑是財產,佔領軍in hit國的執政黨koh khah免講!   2016年五月二十蔡英文總統就任了後,tī行政院下面設立一個「不當黨產處理委員會」(簡稱「黨產會」),對台灣戒嚴時期的政黨財產作調查、發還、追幑、權利回復等工作,蔡英文政府設置chit-ê會,是為tio̍h促進台灣戒嚴時期的轉型正義。中國國民黨聽tio̍h的第一反應是哀父叫母、大細聲喝講是蔡政府beh kā in抄家滅族。無lah無hiah嚴重,只不過是「掠賊在贓」,掠tio̍h賊仔,叫伊kā贓物the̍h--出來,按呢niā-niā。 (180105)
 
< Prev   Next >