首頁 arrow 綠色短評 arrow 寒siuh-siuh,好佳哉台灣四界有溫暖!

寒siuh-siuh,好佳哉台灣四界有溫暖! PDF Print E-mail
Written by 李南衡   
Friday, 12 January 2018

今年一月初七開始,ùi北方來的寒流實在有冷,初九全台灣上低溫攏來到十度,初十、十一有的所在來到七度八度。

高雄市社會局長姚雨靜初九暗去三民區kah鳳山區兩個街友服務中心關懷安置狀況,三民中心會tàng安置九十床位、到hit暗已經安置三十二人;鳳山中心會tàng安置三十三床位、已經安置十五人。中心每一間房攏有衛浴設備thang洗燒水浴,逐個作夥食燒燒的飯。但是猶原有街友無愛接受安置,社會局提供行動燒水洗浴車以外,koh提供睡袋、外套、帽仔、暖暖包、冬天的棉被等kah燒燒的食物。同時派出關懷隊送仝款的物資kah燒燒的食物hō͘獨居長輩。   一月初八,屏東縣政府啟動低溫關懷措施,勸導遊民入去tòa收容所,無愛去的,有提供便當、麻油雞,kah保暖的衫、帽仔、圍巾、睡袋、暖暖包等。加強縣內各社區的獨居老人kah弱勢民眾的關懷。   新北市瑞芳區公所招民間企業作夥發揮愛心,有企業捐贈三十套毛毯、防寒外套kah關懷物資,贈送hō͘獨居老人kah弱勢家庭。   新竹市提供街友臨時睏的所在,贈送in防寒的衫kah暖暖包。mā去關懷獨居長輩照in的需求提供帽仔、暖暖包、手套、冬天的棉被等。Koh為外籍漁工佇新竹漁管所提供洗燒水浴kah免費剪頭,hō͘出外人得tio̍h溫暖。   台中市政府社會局啟動低溫關懷服務,去第二市場、東協廣場、五權地下道kah各公園街友聚集的所在,發放燒的食物、外套、睡袋。願意接受bih寒庇護的街友,載in去庇護所。衛生局派出愛鄰守護隊去關懷弱勢族群kah獨居老人。   台北市社會局社工科長表示,kah永年仝款,氣溫若比十二度khah低tio̍h會加開避寒所,一月初十暗已經koh加開兩個避寒所hō͘街友庇護,無beh去的街友,mā會提供in欠缺的防寒物資。   寒流期間,交通部國道高速公路局佇高速公路服務區服務台,攏有提供免費的燒茶kah燒薑茶,而且公共便所全部提供燒水hō͘民眾洗手。同時為tio̍h有心血疾病的民眾需要,各服務區有準備血壓計kah氣氣筒。   每年寒天,人安基金會攏會佇台東市、花蓮市kah羅東鎮等各所在的「人安平安站」,提供平安站的房間hō͘街友bih寒。平安站內底會tàng洗燒水浴,koh有提供睡袋、暖暖包、泡麵、麵包、餅干等。In的用意是:「結合本鄉本土愛心,照顧本鄉本土寒士」,實在有夠讚!   寒流一下來,寒siuh-siuh,好佳哉台灣四界有溫暖,hō͘咱心頭一陣燒! (180112)
 
< Prev   Next >