首頁 arrow 綠色短評 arrow 監察院無清bē使!

監察院無清bē使! PDF Print E-mail
Written by 李南衡   
Friday, 19 January 2018
2014年七月,立法院臨時會行使第五屆監察委員同意權投票,有十一位hō͘立法院否決,致使「半遂」的監察院亂抄抄,憲法賜hō͘ in的「上方寶劍」無才調用,像講糾正、彈劾、糾舉等職權攏總拍對折無夠力,所以才tio̍h由蔡英文總統補提名十一位,今年一月十六請立法院行使同意權投票。 中國國民黨kah親民黨立委表示抗議無beh投票,giú一條寫有「主張廢除監院,猶有面作監委,國際大笑話」的布條,口號喝喝咧,koh去kā圈票處的布屏ián-ián倒。蔡總統提名的十一位是:王幼玲、田秋堇、瓦歷斯‧貝林、林盛豐、高涌誠、陳師孟、楊芳婉、趙永清、蔡崇義、楊芳玲攏通過,in的任期到2020年七月三十一。   新監委陳師孟接受中央社記者訪問的時表示,上任後上希望對監察院審查內規提出改善意見。伊講,現在彈劾案審查結果是採取無記名投票,也無公布逐個的意見。in幾位新科監委攏認為,監察院的審查規則應該tio̍h透明公開,「hō͘日頭光照入來」。陳師孟講,現在連立法院審查案to̍h採用記名投票,監察院一定tio̍h保密是無啥道理,每一位監察委員tio̍h對家己的意見負責。新監委高涌誠表示無反對,但是mā m̄是完全贊成,伊認為彈劾案的討論過程應該公開,mā-tio̍h保障獨立行使職權,投票部分會使事後才公開,伊贊成彈劾案的程序應該受tio̍h監督。新監委楊芳玲mā同意監委佇調查過程中應該像檢察官辦案的偵查不公開,免得影響當事人的名譽抑是hō͘調查受tio̍h干擾,但是彈劾結論出來了後,tio̍h應該公開啥人同意、啥人反對,因為資訊公開是政府對人民負責的基本原則。   咱看監察院兩遍彈劾基隆市長張通榮攏無過,親民黨副秘書長劉文雄piak講,ùi張通榮案發後到監察院彈劾投票前,監委至少有去基隆三遍,私下接受張通榮佇五星級飯店宴請招待,2013年八月,監察院召開第一遍彈劾審查會,四票對六票彈劾案無通過。最高法院檢察署檢察總長黃世姳hông控告牽涉tio̍h洩密案,2014年一月初七,監察院再開彈劾審查會,六票對六票,彈劾案無過,照程序,監察院bē使koh對chit-ê案提出彈劾。全台灣的人攏看kah gang-gāng去,直直問講那會按呢?監察委員啥人反對、啥人贊成,啥理由?無人知。   暗bong-bong的監察院,tio̍h親像新監委陳師孟講的「hō͘日頭光照入來」,若是以後攏會tàng公開透明,監察院tio̍h會清。問題是「水清tio̍h掠無魚」,莫怪「濁 (lô)」慣勢的中國國民黨立法委員、kah馬英九前總統會hiah呢受氣、hiah呢反對chit十一位監察委員入去監察院。   In愈反對,咱tio̍h愈鼓勵chit十一位監察委員khah拚咧,監察院tio̍h hō͘清! (180119)
 
< Prev   Next >