首頁 arrow 綠色短評 arrow Hō͘人民減稅免稅,三百年來頭一個!

Hō͘人民減稅免稅,三百年來頭一個! PDF Print E-mail
Written by 李南衡   
Friday, 26 January 2018

蔡英文總統就任一年半以來,同時做傷濟項改革,其中有幾若項改革有人提出無仝的看法,甚至遊行示威反對。干單稅法改革得tio̍h絕大多數人民的歡迎kah謳咾,因為chit-ê稅法改革hō͘真濟人喘一個大氣,特別是低收入的艱苦人。

上大的改革是月薪無三萬元的人免稅。自早以來tio̍h有人主張,有所得tio̍h應該納所得稅,講tioh道理並深,害咱大嘴開開bē曉應。老實講,佇今仔日的台灣,一個月薪水無三萬元的人若有某子,儉腸neh肚to̍h足歹過日ah,koh叫伊納所得稅,實在是真酷刑。新稅法是:年薪四十點八萬(也就是月薪三萬四)以下的人,年薪八十一萬六千元以下的雙薪家庭、抑是年薪一百二十三萬二以下有扶養兩個囝仔的雙薪家庭,攏總ùi tio̍h納稅變作免納稅。減稅的部分,標準扣除額ùi原本的九萬提懸至十二萬(有翁某的加倍)、薪資所得扣除額ùi十二萬八提懸至二十萬、幼兒學前特別扣除額ùi兩萬五提懸至十二萬。營業稅的部分,獨資合夥組織無課營業稅、未分配盈餘加徵營所稅率ùi 10%降作5%。   政府是按怎tio̍h kā人民khioh稅金?因為國家tio̍h作各種的建設kah社會福利、教育、國防等,另外一條大條的是全國的軍人、中央kah地方的公教人員的薪水kah in的退休金,tio̍h用去政府總支出的兩成外.。   當然chit遍稅改mā有增加稅金的部分,像講營業所得稅ùi 17%調懸至20%,外資股東股利所得扣繳率ùi 1%調懸至21%,koh bē-tàng抵繳未分配盈餘加徵稅額所增加的稅收。   按呢,hō͘五百四十外萬低收入的人減稅免稅額,kah增加稅收的部分,掩來chhé去政府一年mā才減收198億nia-niā。198億chiah大條錢那會講nia-niā?咱看往年仔政府kā chit五百四十外萬低收入的人所khioh的稅金,那像是khioh鳥仔屎。另一方面,2015年國寶、幸福人壽頭人ó͘一孔烏lang-lang,保險安定基金tio̍h賠付303億。Siáng的錢?政府賠的當然是人民納的稅金;2016年兆豐銀行紐約分行因為違反洗錢防制法,hō͘紐約州金融服務署罰美金一億八千萬,差不多是新台幣57億,siáng的錢?Mā是人民納的稅金。2017年慶富獵雷艦詐貸弊案piak孔,若解約成,聯貸的公營銀行tio̍h賠102億,siáng的錢?當然mā是人民納的稅金。一遍koh一遍發生chit款代誌,會使講是政府teh lòng大銃。一年減lòng一兩遍大銃,根本to̍h無需要向chiah-ê艱苦人khioh鳥仔屎稅金。蔡英文政府知影按呢、koh會曉按呢做,會堪得kā大聲謳咾。   Hō͘人民減稅免稅的政府,台灣三百年來頭一個!
 
< Prev   Next >