首頁 arrow 綠色短評 arrow 陰魂不散害冤魂不散!

陰魂不散害冤魂不散! PDF Print E-mail
Wednesday, 11 March 2009
        二00七年五月十九,為tioh8紀念中國國民黨政府佇蔣介石領導下,ti7五十八年前發佈戒嚴令,而且破世界紀錄實施三十八久,阿扁總統執政e5民進黨政府ti7 hit工將「中正紀念堂」改名作「台灣民主紀念堂」,阿扁總統及教育部長杜正勝共同舉行掛牌儀式。阿扁總統致詞特別指出,蔣介石當政e5時迫害人權,而且歷史ma7已經確認蔣介石是二二八事件e5元凶。竟然用封建帝王陵寢作藍圖,處處突顯黨國體制及個人崇拜e5紀念堂,來懷念追思一個破壞人權的獨裁者及刣人e5兇手,實在是無適當。教育部長杜正勝講,咱按呢做並m7beh抺殺蔣介石佇台灣e5歷史,顚倒是beh hou7e5子子孫孫深切認識,台灣民主e5路是按怎坎坎硈硈行來e5,自由民主m7是天落落來e5

Hit當時chit件代誌引起朝野褒貶極端無仝e5意見:民主人士阿佬阿扁總統按呢做就是teh拍破對蔣介石e5個人崇拜,ma7是啟示以後台灣mai3 koh有個人崇拜致使傷害tioh8一般人民e5人權;二二八事件受害者及受難家屬認為,按呢做ma7算作是ka7蔣介石e5陰魂趕出台北、甚至是ka7趕出台灣,khah可惜e5是阿扁總統動作傷慢,拖到執政尾仔年才做chitchiah有意義e5代誌;中國國民黨支持者e5看法拄拄倒反,認為民進黨政府按呢做,明明就是意識型態teh變鬼變怪,對一位已經過身了e5偉大國家元首,無應該採取chit種手段。

二00七年年尾台灣立法委員改選及二00八年台灣總統大選,中國國民黨大贏,馬英九就任總統無偌久,行政院就teh研究beh按怎來否定早前民進黨將「中正紀念堂」改作「台灣民主紀念堂」chit項代誌。今年二二八進前,馬英九講,兩冬前民進黨政府違法將紀念蔣介石e5「中正紀念堂」改作「台灣民主紀念館」,chit-ma2beh koh ka7改倒轉來!而且ti7二二八進前,有中國國民黨籍立法委員講,beh刪減二二八紀念基金會e5國家預算,koh beh提議取消二月二八chite5假日,講二二八紀念tioh8好,tioh8 ka7改作無放假e5紀念日。

雖然馬英九總統南北奔波趕場參加二二八紀念會,猶原無法度得tioh8二二八受害者及受難家屬e5諒解,in認為馬英九是「雙面刀鬼」。是按怎一面及二二八受害者及受難家屬表示友善和解,一面強beh ka7已經改名e5、算是中性、無啥黨派色彩e5「台灣民主紀念館」改倒轉去「中正紀念堂」,一定beh來紀念二二八e5元兇咧?

按呢,刣人e5蔣介石陰魂不散,害hong5e5二二八冤魂不散!中國國民黨及馬英九,恁何mih苦啊!

 
< Prev   Next >