首頁 arrow 綠色短評 arrow 台北市長候選人,民進黨一定tio̍h家己提名!

台北市長候選人,民進黨一定tio̍h家己提名! PDF Print E-mail
Written by 李南衡   
Friday, 02 February 2018
 2017年十一月,年輕的台灣查某子謝依旻參加日本「女流本因坊」賽,連嬴兩局了後、續落去連輸兩局,伊想講chit聲無望ah。為tio̍h排除低潮的壓力,伊利用第五局猶未比賽的時間,走去看寶塚(Takaratsuka)歌劇團公演的「柏林‧我的愛」,一部以第二次世界大戰戰時作背景的歌劇,描寫一位導演佇德國納粹壓迫下無法度盡情發揮,直直想beh放棄的時,一位演員鼓勵伊講:「無到最後絕對m̄-thang放棄,tio̍h相信家己的信心。」 謝依旻講,chit句話hō͘伊真大的激勵,決心無beh放棄,才佇第五局嬴了對手。今年一月二六,日本棋院佇東京為伊舉辦就位典禮,因為伊以三比二奪回「女流本因坊」的稱號。Chit位1989年佇台灣苗栗市出世的謝依旻ùi 2007年,十八歲頭一遍the̍h tio̍h「女流本因坊」稱號了後,連續六年保持寶座,2014年輸去,2015年奪回、第二年koh輸去,2017年koh嬴倒轉來。Ti chit十年中間,伊經過「女流本因坊戰」、「女流名人戰」、「女流棋聖戰」,得tio̍h「女流三冠王」的稱號,是日本女子圍棋界的第一人。無beh放棄、有自信,hō͘伊tī危急的時戰嬴。伊m̄-nā是日本職業圍棋界中得tio̍h上濟遍稱號的女子棋士,伊mā得過「名譽女流本因坊」、「名譽女流名人」kah「名譽女流棋聖」三項稱號資格,是日本圍棋史上第一個得tio̍h chit三項稱號資格的女子棋士,但是chit三項稱號tio̍h等到六十歲、抑是退休了才會使使用。   今年底台北市長的選舉,民進黨到taⁿ猶未決定是beh koh再讓柯P抑是民進黨家己提名候選人。若讓柯P,m̄-nā台北市議員選舉無雞母chōa雞仔子的悲哀,chit種無信心的行為會hō͘台北市民進黨的支持者chhè心、無愛出來投票,台北市民進黨議員真有可能會慘敗,chit種無信心mā會湠到全台灣,兵敗若山倒。   民進黨中央無應該對台北市長選舉無信心。頂遍台北市議員選舉結果,佇63席市議員中,民進黨當選27席,中國國民黨當選28席,雖然民進黨市議員比中國國民黨市議員少一席,第七選區當選的中國國民黨市議員才2,937票,第八選區當選的中國國民黨市議員才2,157票。別區攏mā一兩萬票才會當選。台北市民進黨議員得tio̍h總票數578,066票、中國國民黨總票數565,783票。Siáng講台北市藍比綠khah大?若猶koh無自信,咱看2016年總統副總統大選,民進黨的蔡英文、陳建仁得757,383票、約51.96%,中國國民黨朱立倫、王如玄得546,491票、約37.49%,民進黨嬴210,892票。民進黨的信心敢是hō͘狗咬去?   目前有一個上好的例thang學,本屆日本圍棋界的「女流本因坊」謝依旻小姐最後一局戰嬴的秘訣是:無beh放棄、有自信! (180202)
 
< Prev   Next >