首頁 arrow 綠色短評 arrow 人講「中國國民黨是白賊黨」,敢無影?

人講「中國國民黨是白賊黨」,敢無影? PDF Print E-mail
Written by 李南衡   
Monday, 12 February 2018
 二月初七新聞報導,後屆嘉義市長選舉,中國國民黨人選協商,因為嘉義市議長蕭淑麗退黨參選才破局。二月初五中國國民黨主席接受媒體訪問的時講,四年前蕭淑麗有chhōe伊,請秘書長曾永權成全退黨的蕭淑麗當選議長。 二月初六,蕭淑麗發表聲明罵吳敦義公然講白賊、歪曲事實、混亂視聽。伊講2014年伊無條件禮讓陳以真代表中國國民黨參選嘉義市長,退選市長了後,原本拍算beh小歇一站,但是前議長蔡貴絲已經作過三屆議長、無beh koh做,真濟議員前輩勸伊tio̍h接續,伊才會投入議員選舉koh參選議長,佇跨黨派議員支持下順利當選。當時mā是因為中國國民黨選輸市長選舉,佇市黨部拜託之下,伊才會以中國國民黨籍參選議長,tī中國國民黨無氣脈的時為黨承擔。伊批評吳敦義身為黨主席,m̄-nā無感念黨員同志對黨的貢獻,koh講出扭曲事實、混亂視聽的言論,m̄-nā加深互相之間的必痕,mā會hō͘同志的心起畏寒。吳主席的講法,koh khah證明伊退黨參選是「正確的決定」。咱相信蕭淑麗是退黨了後才敢講老實話。   中國國民黨chit-ê白賊黨,佇有掛牌的黨主席吳敦義英明領導之下,chit種白賊傳統愈拚愈強。   二月初二,不當黨產處理委員會舉行「民眾服務總社是m̄是中國國民黨的附隨組織」聽證會。黨產會講,中國國民黨刊物kah中常會議紀錄,攏有證據顯示民眾服務社有受中國國民黨的控制。利害關係人中國國民黨代表、該黨考紀會主委魏平政講,黨產會一直引用中國國民黨中常會kah內部會議的資料,the̍h來認為民眾服務總社是附黨的隨組織,是無妥當。魏平政講像講《中國國民黨臺灣省委員會一甲子年史》chit類的「國民黨的文宣」,會有一定程度「誇大」(phòng風講白賊), bē-tàng隨便引用,驚會有危險。奇怪,中國國民黨那有chiah bē曉講白賊,老實kah講家己的黨是「白賊黨」咧!   二月初五,立法委員吳志揚接受電台訪問的時表示伊無beh選桃園市長,而且謳咾桃園市長鄭文燦的經營方式,伊講中國國民黨大概「無人可望其項背」,所以民調特別出色。「無人可望其項背」意思是無人看會tio̍h伊的頷頸kah腳脊phiaⁿ,用台語來講是:無人tòe伊會tio̍h、差大碼咧。第二工報紙登出來了後,中國國民黨桃園市黨部主委楊敏盛隨時反駁講,鄭文燦任內極加是gâu開錢無人tòe伊會tio̍h。逐家原本想講中國國民黨chit-ê白賊黨真難得出一個無講白賊的吳志揚,有夠贊!無疑誤第二工吳志揚緊解說講:是lah,我tio̍h是講鄭文燦開錢無人tòe伊會tio̍h。Koh一遍證明中國國民黨是白賊黨,免懷疑!  (180209)
 
< Prev   Next >