首頁 arrow 綠色短評 arrow 台積電董事長夫人,阮感謝你!

台積電董事長夫人,阮感謝你! PDF Print E-mail
Written by 李南衡   
Monday, 26 February 2018
 二月初六半暝十一點五十分,花蓮發生規模6.0地動,除了人員死傷以外,造成包括統帥飯店在內的四棟建築物kah幾間民宅歸個倒去、抑是重敧爿(tāng-khi-pêng)去,造成幾條路裂開、大橋損害、水道管有歪去有斷去、真濟所在停止供水等等災厄。 蔡英文總統初七早起tio̍h趕到花蓮,行政院長賴清德坐鎮佇台北防災中心指揮調度、初八mā拚去花蓮。咱攏kā感謝。   有一位平民百姓真值得咱感謝的是,台積電董事長夫人、台積電慈善基金會董事長張淑芬女士,初八趕去花蓮、初九透早到災區勘災,瞭解當地災民的需求了後,二月十二宣布救災工作分作三個階段:   第一階段是舊年過年前:已經派遣十台大型水車ùi台南前往花蓮,支援送水服務,hō͘花蓮人有清氣水thang用,一直到自來水正常供應水為止。支援人力,已經派八名運搬工人去到國宅社區,替十六戶社區老人搬運,清除損害的家具;建立啟動募款平台kah招募志工平台,聯合SEMI kah供應鏈愛心企業募集資源,而且kah地方政府合作,滿足災民長期穩定的物資需求。   第二階段是舊年過年後:計劃模仿in佇高雄氣爆後的心靈輔導營,帶領災區兒童離開災區,透過專業輔導營來撫慰幼小心靈,hō͘ in會tàng平靜落來,kā勇氣koh chhōe倒轉來。對政府專業判定的「非結構性」受損害的住宅,協助修補受損的房舍,hō͘居民住tio̍h會安心,免除驚惶的心,盡量會táng早一日恢復正常生活。照募款的金額,以老人kah弱勢家庭優先辦理。   第三階段是長期:希望會tàng協助重建花蓮整體的觀光產業,地動對花蓮的觀光衝擊,直接影響tio̍h居民的生計,甚至連菜市仔賣菜的攤販都受tio̍h影響。雖然重振觀光產業m̄是台積電的專業,但是台積電慈善基金會猶原計畫beh投入資源kah政府合作,協助花蓮重建觀光產業。   Hō͘咱koh想起2014年七月三十一半暝一直到天光,高雄發生氣爆事件,八月初四,仝款chit位台積電董事長夫人張淑芬女士chhōa人去勘災了後,隨時著手重建工作,為災民修繕房屋659件361戶、完成安全籬笆4,858公尺、臨時便橋五座、臨時道路4,576公尺、攏總用的工人4,000人次、進場機具370台次。災民看tio̍h重建好的厝、平坦坦的路,感動kah流目屎。有人提議kā公園kah大路改作「台積電公園」、「台積電路」,張淑芬女士說謝講按呢m̄好,因為chit遍的爆災重建是逐個出力的,有協力廠、有志工、有真濟暗中捐錢出力的人,m̄是干單台積電的功勞。張淑芬女士,台灣有你實在真好,阮感謝你! 
 
< Prev   Next >