首頁 arrow 綠色短評 arrow 罵人會使罵kah chiah實在!

罵人會使罵kah chiah實在! PDF Print E-mail
Written by 李南衡   
Friday, 16 March 2018
自了m̄-bat罵人的人應該無濟,自了m̄-bat hông罵的人應該koh khah少。作人序大、主管、老師、老大、有錢有勢的人khah會罵人,有時顚倒是道理khah輸人的人罵khah大聲。作人序細、部屬、學生、細漢的、無錢無勢的人 khahhông罵,有時khah有道理的人顚倒hông罵。 罵人的話有的誠有道理、有的是講氣話。若是烏白亂罵、罵了傷過頭,mài講hông罵的本人,有時會刺鑿tio̍h邊仔人的耳孔毛,正是咱所講的「情理不平,氣死閒人!」   中國全國人大會三月初八開幕,teh beh落台的中國國台辦主任張志軍表示今年兩岸情勢「會koh khah嚴厲、複雜」,對台工作「會抵tio̍h koh khah濟的風險kah挑戰」,原因是台灣拒絕承認「九二共識」,責任佇台灣hit旁。你看中國按呢拍人喝救人,總統府發言人黃重諺回應講,佇兩岸的關係,台灣自了m̄-bat是影響兩岸關係負面的一旁,政府認真維護兩岸和平關係國際社會攏有看tio̍h。   二月二七早起,反年改團體聚集立法院抗議,退伍上校、「藍天行動聯盟」秘書長繆德生,peh起去立法院建築物外壁,無細膩跋落來,受傷嚴重。Hit下晡,中國國民黨主席吳敦義聲明,要求執政黨tio̍h為chit項代誌負最大的責任。伊質疑蔡政府上台了後「m̄-nā無全力拚經濟,顚倒kah經濟對拚」,才會hō͘退休軍公教人員的生活「雪上加霜」、「愈來愈歹過」,才會發生今仔日的不幸事件。   中國國民黨主席吳敦義按呢罵民進黨、蔡英文政府,m̄知幾個人聽有?軍人年金改革猶未實施,硬牽連退休軍公教人員的生活「雪上加霜」、「愈來愈歹過」咧?一陣人拚去立法院示威抗議軍人年金改革,立法院長蘇嘉全講「Chit-ê草案連行政院院會都猶未通過,chit碼拚來立法院抗爭未免傷過早,應該知影內容才來反映,希望逐個理性面對。」伊講,院方原本有預期反年金改團體會有一寡動作,但是警方布署上猶原希望用軟性方式勸導,但是抗爭者動作傷過激烈,m̄是警方所會tàng控制的。年金改革應該按怎訂khah合理,逐個會使坐落來協商。   一月二五,新北市長、中國國民黨前主席朱立倫回應外界認為中國國民黨有「兩粒日頭」的講法,重申che是謠言。伊表示,中國國民黨內底現在需要的是「khah濟日頭」,朱立倫市長講「黨內有兩粒日頭」是謠言。表面上是講伊家己並m̄是日頭,koh khah深的意思是講,今仔日中國國民黨黨內根本無日頭,等於間接否定吳敦義是日頭,m̄是咱kā想歪去。你看伊講:中國國民黨內現在需要的是「khah濟日頭」,意思真明,現此時中國國民黨內底暗bong-bong、烏sô-sô。   真罕得聽tio̍h,罵人會使罵kah chiah實在! 
 
< Prev   Next >