首頁 arrow 綠色短評 arrow 家己刣趁腹內!?

家己刣趁腹內!? PDF Print E-mail
Written by  李南衡   
Monday, 26 March 2018
今年是台灣九合一大選的一年,舊曆過年了,各黨各縣市長的候選人tio̍h開始黨內初選。kah永年仝款競爭真激烈,特別是先初選的高雄市、台南市kah嘉義縣。 Chit三縣市民進黨的聲勢誠懸,那像黨內提名啥人tio̍h差不多八九成穩當選市長,致使縣市長黨禸初選tio̍h那像真正大選,攏拚kah流血流滴,甚至有的所在照新聞媒體批評講是拚kah真粗殘(chho͘-chhân),描寫講是「刣kah見骨」!有老人新聞看kah搖頭頭講:「家己刣,趁腹內。」   早前佇台灣庄腳,差不多每一口灶攏有飼雞鴨,年仔節仔抑是鬧熱pái,tio̍h刣雞刣鴨,家己ham-bān bē曉刣抑是m̄敢刣,tio̍h拜託厝邊隔壁刣,一般攏是鬥相仝無the̍h錢,總是刣好的歸隻雞鴨the̍h還伊的時,照例tio̍h kā雞鴨的腹內仔留起來享用。若是家己刣,雞鴨的腹內仔當然家己煮來食,所以才會有「家己刣趁腹內」chit句台灣俗語話。   早前台灣農村社會,每一個家族攏是三、四代人tòa作夥無分厝,可能是農家有需要khah濟作穡的腳手。一旦需要分厝往往會為tio̍h財產分bē好勢,煞起爭執相冤家、相拍起相告。遠親的序大tio̍h會hàiⁿ頭講:「家己刣趁腹內!」並m̄是講厝裡的兄弟叔伯冤家相拍有啥物「腹內」通趁,chit句話是teh供體、摳洗至親的兄弟叔伯冤家相拍,無啥物好孔的流去別人兜。   Chit遍民進黨黨內初選高雄市長,四位候選人拚kah流血流滴,三月初七民進黨中央公布黨內初選民調結果,陳其邁民調支持度35.9%嬴過趙天麟、林岱華、管碧玲,三位落敗者隨時喝講全力輔選陳其遇,hit陣當佇日本行銷高雄農產品的陳菊市長講:Tī競選期間參選人的競爭難免,呼籲初選後回歸團結。三月初八早起,民進黨中央公布台南市長初選結果,黃偉哲以0.4158嬴過陳亭妃、顏純左、王定宇、李俊毅、葉宜津五人。初選期間陳亭妃kah黃偉哲陳營互相指控對方抺烏。無疑誤初選了十三工後的三月二一,民進黨舉行中常會的時,陳亭妃針對台南市長初選一事,向蔡英文主席抱不平,要求黨中央kā黃偉哲送廉政委員會。蔡英文主席感慨講:黨內選舉實在無必要選kah chit款。三月初五嘉義縣長黨內初選完成民調作業,翁章梁嬴張明達,初選過程中兩個陣營互相控告對方用語音干擾民調。三月二一,民進黨蔡英文主席落去嘉義kah兩位見面了,兩位攏kā初選的恩怨放下、相攬化解心結,大聲喝出:「民進黨加油,嘉義進步!」   平平是「家己刣趁腹內」,佇高雄市、台南市kah嘉義縣初選中有三種無仝的結局,m̄知你khah合意叼一種?  (180323)
 
< Prev   Next >