首頁 arrow 綠色短評 arrow 是按怎柯P tio̍h kā「兩岸一家親」攬tiâu-tiâu?

是按怎柯P tio̍h kā「兩岸一家親」攬tiâu-tiâu? PDF Print E-mail
Written by 李南衡   
Friday, 13 April 2018

2017年七月初,柯文哲市長去上海參加「台北上海雙城論壇」,有講tio̍h兩岸一家親」。伊講其實兩年前(2015年)伊tio̍h bat講過。2017年柯市長koh加講「兩岸是命運共同體」kah「兩岸床頭拍床尾和」,引起台灣人大受氣。

2017年十月十八日,中共十九大,中共總書記習近平作政治報告的時,有提起:「兩岸同胞是命運與共的骨肉兄弟,是血濃於水的一家人。咱tio̍h秉持『兩岸一家親』理念。」有一寡m̄-bat字的台北市民講,你看,連中國的領導者習近平mā tòe柯市長的後面講「兩岸同胞是命運與共的骨肉兄弟」,講「兩岸一家親」。錯錯錯!   2013年四月初八抵抵就任中國國家主席的習近平講「兩岸一家人」,仝年的十月初六,習近平才講:倡導「兩岸一家親」的理念,加強交流合作。2014年二月十八,中國國民黨前主席連戰去北京見習近平的時,習近平佇談話中koh一遍強調「希望兩岸雙方秉持『兩岸一家親』的理念。順勢來作,齊心協力,來共圓中華民族偉大的中國夢。」可惜連戰干單有奴才的身分無奴才的頭殼,轉來台灣攏無宣傳「兩岸一家親」chit句聖旨,無彩中國一直透過「讓利」收買中國國民黨hit陣奴才,結果hiah-ê奴才無認真kā奴才的精神表現出來。莫怪中國會怨歎講中國國民黨是一堆爛糊糊的lo̍k糊仔糜,抹bē上壁。   2017年七月初柯市長chhōa隊去上海出席雙城論壇,新聞報導講伊m̄-nā kah上海市長應勇會談,koh有kah國台辦主任張志軍會面,報導講伊是受tio̍h「總理級」的款待。真濟人m̄知啥物原因。真簡單,當時柯市長雖然猶未有奴才的身分,但是伊已經有奴才的精神kah表現,伊一再宣讀習近平的「聖旨」:「兩岸一家親!」習近平龍心大喜,當然會kā柯P看作上蓋「知心」的奴才,中國頂頂下下的大細粒官員kā柯P準作「寶」的程度,超過任何一個中國國民黨黨官。柯文哲市長當然mā知影chit點。所以伊講2015年伊tio̍h講「兩岸一家親」,伊解說講,當時講chit句話只不過是為tio̍h緩和氣氛。是按怎2017年又koh講?   四月初十佇台北市議會質詢的時,民進黨市議員洪健益足受氣表示,柯市長的兩岸言論hō͘民進黨支持者非常反感,你到底有beh改變「兩岸一家親」的講法抑無?柯市長應講:「太平洋mā有兩岸、日本mā有兩岸。」柯市長明明是teh kā洪議員kah台北市民裝siáu-ê!按呢你tio̍h知影,是按怎柯P tio̍h kā「兩岸一家親」攬tiâu-tiâu?伊若無繼續講「兩岸一家親」,伊tio̍h bē-tàng 繼續koh作中國奴才Number One!  
 
< Prev   Next >