首頁 arrow 綠色短評 arrow 新北市敢有影無政府?

新北市敢有影無政府? PDF Print E-mail
Written by 李南衡   
Friday, 20 April 2018

新北市三峽區山頂尾溜,有地主山頭刴掉一大塊,新北市政府一直hō͘爛、出在伊亂挖亂起,牆圍、大門都已經起好、一間宮廟的主體mā teh beh完工ah,新北市政府最近才勒令伊停工,koh要求伊恢復原狀。

新北市三峽區長陳健民講,區公所定期有派人巡查山區,「三清萬甲仙境」佇真懸的所在,而且十分的隱密,一直到舊年(2017)十月接tio̍h農委會水保局通知才知影上情,後續管理kah懲處由權責機關辦理。陳區長講chit款話,你敢聽會落去?無論偌呢懸偌呢隱密的所在,一粒山頭刴掉去、拍平作一公頃外(大約三千外坪)平坦坦的建地,挖掉幾十萬立方米的土方(廢土),敢免幾千台的砂石仔車載出去倒掉?Chit兩三年來砂石仔車出出入入,攏無人看tioh?區長伯攏無聽tio̍h風聲,至少mā會聽tio̍h long-lòng叫的車聲!續落去,一間宮廟起kah差不多beh完成的程度,敢免三五百台的大卡車載鐵筋、紅毛土、砂石等建材kah大型建築重器具去起上頂?區長伯敢有影攏無聽tio̍h車聲,無mā有看tio̍h落山上山的車陣。攏無?按呢tio̍h有小可奇怪loh!   新北市政府農業局主任秘書蘇宗益講,舊年十月接tio̍h農委會水保局告知,才知影根據空照圖山頂有變款。市政府山坡地保育科有派人去勘查,但是因為大門鎖tio̍h,ùi外觀真歹發現牆內有啥物無仝款。業者開發範圍有牽涉tio̍h國有林地的部分,林務局已經kā負責人依照竊佔國土罪移送新北地檢署偵辦,農業局猶未依照違反水土保持法第32條開罰,是因為刑事罪責kah行政處分競合,會等案件審結才做夥處置。一粒原本樹林青翠的山頭hông刴一大塊變成光映映、平坦坦的建地koh起懸koh大的牆圍,按呢都已經真無仝款ah!那tio̍h加講大門鎖tioh,ùi外面真歹看出牆內有啥物無仝款?伊到底是tèⁿ khong假戇抑是騙siáu-ê?講大門鎖tio̍h koh khah好笑,刑警去掠毒蟲kah搜查毒品,你敢bat聽刑警講in大門鎖tio̍h無法度入去?而且幾十萬立方米的土方(廢土)beh載去叼位thūn,敢免向市政府申請?市政府敢免問講土方(廢土)是ùi叼位來的?業主犯tio̍h竊佔國土、濫墾山坡地、違反水土保育法、無許可違建,一大堆罪,新北市政府bē曉請警方去法院申請搜索票,強行拍開大門入去搜查犯罪事實kah證據?   Koh khah可惡的是,地主佇偵辦期間猶原繼續施工。新北市準若無三峽區公所,mā猶有新北市農業局,準若無新北市政府農業局,mā猶有新北市副市長,準若無新北市副長mā猶有新北市長。無,攏無人有作為。咱才會問講:新北市敢有影無政府?     
 
< Prev   Next >