首頁 arrow 綠色短評 arrow 「八百壯士」實在m̄是普通的戇!

「八百壯士」實在m̄是普通的戇! PDF Print E-mail
Written by 李南衡   
Friday, 27 April 2018

四月二五下晡,「八百壯士」等反年改團體衝撞立法院,爆發暴力事件。透早聚集佇立法院頭前的時,hō͘警察查tioh té滿汽油的汽油桶、油壓剪、梯、幾條長鐵鍊,警察收起來暫時保管,等待遊行了會發還in。引起「八百壯士」強烈不滿,罵警察搶奪人民財產。申請遊行帶chiah-ê「危險品」beh創啥?警察並是沒收,是暫時保管有啥m̄-tio̍hkoh敢賊khah惡人。「八百壯士」實在真戇。

反年改「八百壯士」副總指揮吳斯懷將軍the̍h一節斷去的指頭仔,講he是陸官47期抗議成員佇衝撞過程中斷去的,吳斯懷罵指控蔡英文政府暴力。有人去查了,原來hit-ê「壯士」是teh giú倒「拒馬」的時hō͘鐵線鈎斷去的。「八百壯士」已經戇kah無是非。   反年改「八百壯士」佇立法院大門進政,有帶手套kah護具、有蒙面、有用繩仔giú開謢欄kah拒馬的。唱聲「軍警一家親」的「八百壯士」,tī四月二五chi̍t下晡tio̍h有八十四位官警tio̍h傷,其中包括中山分局長黃永志、大安分局長周煥興衫giú破、目鏡拍歹去、周局長正腳hông chàm thio̍h傷、一位派所所長手盤hông咬tio̍h傷,無論是chàm、踢、拍、giú、煽,十八般武藝「八百壯士」逐項to̍h會,干單欠一項會曉思考的頭腦niā-niā,m̄是咱愛講伊戇。 新聞記者hông尊稱作「無冕之王」,意思是講「無戴王冠的王」,因為伊無顧tio̍h家己的生命安全,拚勢beh kā上新上正確的消息報hō͘大眾知。致使兩個相刣相戰的時,mā bē去動tio̍h雙方的記者一支毛。新聞的評論比劍khah利,佇一個國家內底行政、立法、司法三權以外的第四權。四月二四下晡,有十七位記者hō͘「八百壯士」霸凌,其中有十四位身軀tio̍h傷、有十位採訪器材hông拍歹去,其中有一位的器材當頭白日hông搶去。「八百壯士」的訴求、in的聲音,beh按怎傳播出去?「八百壯士」敢夠無戇?   兩個相刣相戰的國家,佔領tio̍h對方的領土,mā m̄敢隨便侵佔對敵的病院。四月二六下晡,原本圍佇台大兒童病院外口的「八百壯士」煞雄雄霸佔兒童病院的大廳,有冷氣誠好,逐個坐佇原本留beh hō͘患者kah家屬坐的膨椅,有人teh啄龜有人teh sńg手機仔,妨害破病兒童就醫的機會kah時間。In戇kah m̄知影in的行為反人性、已經犯tio̍h《日內瓦公約》kah《國際人道法》的滔天大罪!反年改「八百壯士」副總指揮吳斯懷將軍講伊會叫in離開,無人插伊。幾十個人都喝bē振動,敢大細聲講是「八百壯士」!   「八百壯士」實在m̄是普通的戇! 
 
< Prev   Next >