首頁 arrow 綠色短評 arrow 新聞局長蘇俊賓放臭屁!

新聞局長蘇俊賓放臭屁! PDF Print E-mail
Friday, 27 March 2009
        三月十一,民進黨立法委員管碧玲佇立法院教育及文化委員會質疑,多倫多台北經濟文化辦事處新聞組長郭冠英,用范蘭欽作筆名,經常佇網路頂面發表鄙視、甚至仇視台灣e5言論,要求新聞局徹查。范蘭欽佇伊e5部落格發表「台巴子tioh8專政」hit篇文,足清楚提起「(中國)武力保台了後,ma7 be7使談任何政治開放,一定tioh8鎮反肅反真濟年,ka7思想改造做好勢,徹底根除癌細胞。陳儀tioh8是佇台灣施行仁政,結果才會hou7倭冦造反e5機會,起了二二八。」伊另外有寫「弱國無外交,台灣m7是國家,當然koh-khah無外交。」

        管碧玲立委要求新聞局theh8出魄力,徹底查清楚。假使駐外人員發表chit款言論,就應該ka7 chit個擔任台灣公職、領台灣人納稅錢,卻公然仇視台灣人e5郭冠英革職查辦。新聞局長蘇俊賓答詢表示,chit項代誌若是真e5,一定會處理。蘇局長證實新聞局有郭冠英chit-e5人,若是郭真正用范蘭欽作筆名發表類似e5文章,已經嚴重違反中立,新聞局了解求證以後,一定會處理。

  郭冠英chit個標準e5中國國民黨官員,一開始當然teN3青否認伊是范蘭欽。經過網友熱心去查證,ka7范蘭欽chit幾年所寫e5文章ka7 chhoe7出來,發現伊侮辱台灣e5言論be7算得濟:啥物「歹丸實在已經無值得愛,歹丸只chhun可恨」、稱呼台灣是「鬼島」、講「台灣hou7西班牙、荷蘭、日本攏佔領姦辱過,所以是國際雜種、多元化、m7是純漢人。Koh辦福爾摩沙被殖民文物展來證明家己是雜種。」而且講伊是「高級中國人」等等看tioh8會噴血e5文章。熱心e5網友koh ka7郭冠英及范蘭欽e5文章對照比較,無m7-tioh8。郭冠英看無底閃bih ah才講范蘭欽就是伊本人!而且對媒體烏白亂彈,彈kah銃子拍tioh8新聞局,致使連新聞局ma7誌載伊be7-tiau5。伊轉去駐地以後koh曠職抗命,講將軍在外,「君命有所不受」,完全無ka7新聞局看在眼內。

  拖到三月二三,新聞局長蘇俊賓才為tioh8新聞局出一個言行不當、做出傷害政府聲譽及尊嚴e5公務員,公開向社會大眾道歉。Ka7郭冠英記兩大過免職。攏無指責伊久長以來操弄激化族群仇恨。蘇局長顚倒講:部分政治人物及政黨領袖,藉chit-e5案不斷操弄激化族群及省籍對立,圖取政治利益,hou7人遺憾。

  Che那像有一個化名范蘭欽e5人放臭屁,民進黨立委管碧玲指出chit-e5化名e5人就是公務員郭冠英。新聞局並m7是處罰郭冠英亂放臭屁,顚倒是指責民進黨直直講有人放臭屁,才hou7逐個感覺屁真臭,是民進黨m7-tioh8。新聞局長蘇俊賓何mih苦放chit粒屁咧?chit粒屁實在有夠臭!(090327)

 
< Prev   Next >