首頁 arrow 綠色短評 arrow 柯P作「共匪同路人」猶無夠格!

柯P作「共匪同路人」猶無夠格! PDF Print E-mail
Written by 李南衡   
Tuesday, 22 May 2018

 五月十五,台北市長柯文哲接受訪問的時再度強調講,「『兩岸一家親』是我的基調」,伊bē tiâu批評現此時台灣社會嚴重的扭曲、「我討厭逐個攏愛人貼標仔,為啥物我tio̍h hông懷疑我的台灣價值,我有問題嗎?」伊問講,你若無講台灣價值,敢tio̍h「共匪同路人」

柯P亂講。兩千三百萬台灣人大部分攏是kā「台灣價值」囥佇心肝底,真少人teh講。到taⁿ,我猶m̄-bat聽tio̍h啥人因為無講「台灣價值」,煞hông貼tio̍h「共匪同路人」標仔的。請教柯P,到底有叼一個人因為無講「台灣價值」煞hông貼tio̍h「共匪同路人」標仔的,啥人kā貼的,請你講hō͘逐個知。   設使柯P是teh講伊本人無講「台灣價值」,煞hông貼tio̍h「共匪同路人」的標仔。按呢是大錯特錯!人會罵柯P是「共匪同路人」,m̄是因為伊無講「台灣價值」。像講柯P講兩岸那像翁某「床頭拍床尾和」,人干單會想講he是柯P家己想家己講、濫糝講的三八話而已,無人會因為chit句話罵伊是「共匪同路人」。但是伊kā「兩岸一家親」、建構「兩岸命運共同題」chit兩句話攬tiâu-tiâu,一日到暗提起來講、koh講「兩岸一家親」是伊的基調。He tio̍h完全無相siâng,因為chit兩句話是中國共產黨總書記習近平講的、是伊對中國kah台灣關係所訂的基調。柯P當然瞭解chit點,所以兩年前柯P第一遍去上海的時,一下抵tio̍h上海市長應勇kah中國大細粒官員的時,伊隨時宣讀習近平總書記的聖旨「兩岸一家親」,啥人敢無kā柯P當作上親蜜的戰友?五月十六佇台北市議會備詢的時伊講,「我支持兩岸一家親,但是我討厭人逼我講!」Ùi心肝底發出來家己歡喜講、kah hông逼才講的,意義當然無仝,伊按呢mā是teh講hō͘中國聽。   五月初九下晡,台北市長柯文哲來咱「綠色和平廣播電台」接受主持人陳雨鑫的專訪,希望柯市長會tàng盡量說明清楚,減少誤會。專訪的時伊對「兩岸一家親」感覺bē爽的民眾講一聲「歹勢」。但是所有的新聞媒體攏講柯市長是為tio̍h伊講「兩岸一家親」向聽眾會失禮。Hit暗台北市政府通知記者koh發新聞稿解說講,伊m̄是為tio̍h講「兩岸一家親」向聽眾會失禮。第二工下晡,中國國台辦發言人安峰山講:「阮有注意tio̍h台北市方面已經有作出澄清」。   柯P的言行hō͘咱想起頂世紀六、七十年代,中國「文化大革命」一陣無頭殼的紅衛兵,in上蓋戇koh有力的行為是:「語錄不離手」(毛澤東的語錄無離手)、「萬歲不離口」(喝毛澤東萬歲無離嘴)。柯P不管時kā習近平總書記的話提起來講,作「共匪同路人」猶無夠格,極加是「共匪紅衛兵」!
 
< Prev   Next >