首頁 arrow 綠色短評 arrow 好心無應該hō͘雷chim!

好心無應該hō͘雷chim! PDF Print E-mail
Written by 李南衡   
Tuesday, 22 May 2018

         機場捷運A7合宜住宅興建完工了後,2016年陸續交厝,桃園市府釋出225戶作社會住宅出租,2017年正月初一起陸續搬入去住,才發現四千八百戶合宜住宅的大社區,無設置污水處理場,佇chia生活幾萬人所排放的生活污水,tio̍h是直接排入溪流,會污染tio̍h新莊水源地,影響數十萬新北市民的生活品質。

 

事實上,機場捷運A7合宜住宅ùi規劃興建開始tio̍h問題一大堆。當時的桃園縣長吳志揚tī規劃興建的時,完全無考量tio̍h污水處理的問題。   

五月二一,新北市議長蔣根煌拜託蘇貞昌kah伊去拜訪桃園市長鄭文燦,才koh邀請內政部營建署官員,作夥去會勘機場捷運A7合宜住宅污水排放問題,營建署答應補助經費設置專管(kóng)來解決。新北市朱立倫市長kah侯友宜副市長已經作七年半ah,新莊地區的市議員無分藍綠,一再提出質詢,攏無聽講beh按怎處理、歸個放外外,實在會hông煩惱著急。蔣根煌是新莊出身的中國國民黨籍新北市議會議長,伊非常關心新莊人食水的安全問題,伊應該是想kah攏無步ah,才會去拜託kah伊無仝黨的民進黨新北市長參選人蘇貞昌。蘇貞昌相信mā是想講,為tio̍h新北市民的幸福,那有分啥物黨咧!才會無推辭去走chông。代誌辦了,蘇貞昌才會講,朱立倫無beh拍的電話我來拍,無一個月的時間,tio̍h kā幾若年留佇hia的問題解決好勢。   

無一句感謝to̍h真害ah,新北市長朱立倫煞回應講,chit幾年新北市污水下水道接管五十外萬戶,目前污水接管率有85%以上,絕對bē污染別的縣市,bē污染桃園市,蘇貞昌擔任台北縣長的時,接管率只有個位數。中國國民黨新北市長參選人、mā是現任新北市副市長候友宜無奈吐氣苦笑講,新北市bat向中央反映過A7合宜住宅污水問題,一直攏無解決。伊講A7合宜住宅污水問題原本tio̍h是中央營建署應該處理的,選舉beh到ah,老縣長掠桃園市長鄭文燦,向中央講一聲馬上tio̍h beh做。蘇貞昌佇真濟議題頂面攏是為tio̍h選舉!   

奇怪!2016年四月陸續交厝kah交厝進前,作總統的是中國國民黨的馬英九,當時新北市長是朱立倫、副市長是侯友宜兩位neh,in那會無向中央反映?抑是有反應中央無插in?啥物攏怪別人,敢免小可檢詩家己一下?   

聽tio̍h朱立倫市長kah副市長、mā是中國國民黨新北市長參選人侯友宜的話,蘇貞昌怨歎講,伊協助解決污水處理的結果tio̍h顛倒hông酸,有影是「好心hō͘雷chim。」相信市民會還伊一個公道。   

新北市民當然會想講:有影to̍h tio̍h,好心無應該hō͘雷chim!
Last Updated ( Tuesday, 29 May 2018 )
 
< Prev   Next >