首頁 arrow 綠色短評 arrow 出家人be7使濫摻講話!

出家人be7使濫摻講話! PDF Print E-mail
Friday, 03 April 2009
        三月三十,佇中國無錫參加第二屆世界佛教論壇開幕式e5時,主辦單位之一e5台灣佛光山星雲法師佇會中有講:「我想,來往,你來我往,來往一下濟,siang2siang2往就分be7清楚,按呢就統一ah!抑是講你愛我,我愛你,究竟siang2是你,siang2是我ma7 be7清楚,Siang2是台灣?siang2是大陸?按呢一家人tioh8統一ah!」伊koh講:「兩岸一家,原本就是手足一體,我佇台灣bat講過,台灣無台灣人,台灣真濟中國人mah,你講台灣to2一個m7是中國人?」

        消息傳轉來台灣,hou7真濟人驚tioh8!想講星雲法師那會按呢講咧?中國國民黨殖民政府ui3一九四九年五月二十開始,佇台灣實施戒嚴,配合tioh8「動員勘亂」體制,台灣人生活佇白色恐怖下面m7敢有家己e5想法,黨國教育將近半世紀,ka7台灣人洗腦洗kah戇戇去,攏一直想講台灣人就是中國人。一九八七年廢除了三十八年久e5戒嚴,到一九九0年終止「動員戡亂」條例,台灣才漸漸脫離恐怖政治e5陰影。續落去廢掉萬年國會、民選總統,經過李登輝前總統及政黨輪替後阿扁前總統e5拍拼,台灣人才慢慢覺醒起來,才敢家己思考代誌、敢講家己是台灣人。二00六年二月至十二月,由自由時報民調中心、海基會兩遍委託山水民調公司、國立政治大學選舉研究中心等機構e5民意調查結果,講家己是台灣人e5攏是六十筢左右,講家己是台灣人ma7是中國人e5是十六筢至二十筢,講家己是中國人e5是四筢八至十七筢三。星雲法師問講「你講台灣to2一個m7是中國人?」民調早早就顯示有超過一半khahe5人認為家是台灣人,認為家己是中國人e5無夠二十筢。

  Che中間,咱台灣一年去中國e5ui3幾萬到幾十萬到超過一百萬人,in中國一年來台灣e5ui3幾百到幾千到幾萬人,結果是台灣人顚倒愈來愈濟人認為家己是台灣人,並m7是照星雲法師所講e5「你來我往,來往一下濟,siang2siang2往就分be7清楚,按呢一家人就統一ah!」

  世界宗教論壇大會中國發言人明生法師表示:假使Dalai Lama若有beh放棄西藏獨立e5主張,停止分裂中國e5活動,公開聲明「西藏是中國不可分割e5一部份」、承認「台灣是中國不可分割e5一部份」、承認「中華人民共和國是中國唯一e5合法政府」,主辦單位就會使考慮邀請伊參加論壇。Dalai Lama那會hou7全世界e5人尊敬?因為Dalai Lama知影出家人不妄語,意思是講出家人be7使講無影e5代誌,be7使濫摻講話,伊干單講伊bat、講伊知e5代誌。
 
< Prev   Next >