首頁 arrow 綠色短評 arrow 正直善良的人無應該hông凌遲!

正直善良的人無應該hông凌遲! PDF Print E-mail
Written by 李南衡   
Tuesday, 12 June 2018

 

六月初一,中國國民黨台北市議員陳重文質詢的時,質疑「台北農產運銷公司」總經理吳音寧有買六十罐洋酒送hō͘民進黨台北市黨部作黨慶賀禮。吳音寧因為手裡無資料thang看,當時並無隨時否認,干單講伊所用的經費攏符合公司規定。Hit暗伊接受訪問的時有講,伊轉去辦公室查了,根本無買六十罐洋酒送民進黨台北市黨部。第二早起,北農發布新聞稿,強調經過查證並無買六十罐洋酒送hō͘民進黨台北市黨部。另外北農指出,業務推廣費用贈送對象以「貴賓」統稱,是沿用公司的慣例。北農有強調,吳音寧上任到taⁿ kah永年比起來,業務推廣費的支出有大大的減少,chiah-ê支出攏有符合相關的法規。


 

Khah奇怪的是,民進黨台北市黨部是按怎無隨時開一個記者會,公開澄清根本無影有hông送六十罐洋酒。雖然台北市議員陳重文佇議會質詢有免責權,但是無影的代誌若烏白講相濟,會影響伊本人的信譽。   

六月初五下晡兩點,趁北農總經理吳音寧佇市議會備詢的時,柯文哲市長派台北市政府財政局去北農查數。台北市政府財政局是北農監察人當然有權去查數、速度chiah緊mā是in的自由。北農主任書秘路全利證實chit件代誌,而且講查數作業tī hit暗七點外結束。亂來的是,柯市長憑啥物派政風處kah監察人作夥去查一間民營機關的數咧?聽tio̍h「政風處」隨時會hông想tio̍h某一個政府機關有啥物「不法」。柯市長按呢做m̄-nā是軟土深掘而且是違法!   

今年二月初,吳音寧用北農總經理業務推廣費新台幣一萬九千一百五十二元,去買原本beh hông擲掉的九千一百二十公斤的蔬菜送hō͘社會福利團體,引起外界的質疑,講贈送數量kah流向不明,事後hông檢舉涉嫌圖利、貪汙。吳音寧日前開記者會講,北農並m̄是公務機關,用業務推廣費買蔬菜殘貨送hō͘社會福利團體,合情合理合法。五月二四下晡,台北市議會市政總質詢的時,中國國民黨市議員王鴻薇問柯文哲對chit件代誌的看法。柯市長講:吳音寧按呢做有合法,但是「政治不正確」。柯市長明知吳音寧無做m̄-tio̍h,無beh還伊清白。柯市長是想講,吳音寧負面的消息,會tàng凸顯民進黨用人不當、執政不利。Che對某一寡人的選舉確實有利。柯市長那會講吳音寧是「政治不正確」?咱知影中國國家主席習近平tio̍h是用chit句「政治不正確」罵薄熙來、周永康、徐才厚、令計劃hit陣人。烏心肝一再欺負吳音寧的柯文哲,koh chiah呢愛tòe紅色中國主席習近平講話。伊那會是伊家己講的「白色」,明明是「烏tò͘紅」的!

善良的台灣人攏真清楚:正直善良的人無應該hông凌遲!   
 
< Prev   Next >