首頁 arrow 綠色短評 arrow  郝龍斌有影有夠hàu-tai!

 郝龍斌有影有夠hàu-tai! PDF Print E-mail
Written by 李南衡   
Friday, 15 June 2018

 六月初六,第十屆「海峽論譠」開幕,chit-ê「海峽論譠」是中國對台灣上大型的統戰平台,中國hit旁講有八千台灣民眾參加。中國國民黨副主席郝龍斌chhōa四十八人團去廈門參加。有十位中國國民黨立委,包括江啟臣、王育敏、柯志恩、李彥秀、陳宜民、楊鎮浯、許淑華、顏寬恒、呂玉玲、鄭天財等人,立法院休會的隔日透早tio̍h拼去中國,拜會「國台辦」主任劉結一,除了立法委員,猶有中國國民黨黨官、幾位學者、社團、台商kah青年代表。

 

 照「海峽論譠」官網所講的,所有參加論壇的台灣民眾攏會tàng享受「落地接待」,tio̍h是台灣民眾干單負責來回機票to̍h好,一落飛機,台灣民眾佇中國境內參訪、觀光,所有的食、住、交通,攏總由中國包辦,有關的行程mā攏由中國規劃、全程由「對台辦」人員陪伴,按呢收買民心,達成統戰目的。俗語話講「食人的飯、講人的話。」中國國民黨副主席郝龍斌tio̍h拼勢講中國的話。   

郝龍斌佇開幕致詞,先感謝對岸各級政府對佇中國大陸台灣人的照顧,hō͘所有的台灣人攏感受tio̍h轉來厝的溫暖。伊強調國、共兩黨佇兩岸交流合作頂面是同伴關係,佇振興中國的關鍵時期,國、共之間tio̍h用「九二共識」、「反對台獨」作基礎的合作,才會tàng復興中華,對得起歷史所賦hō͘咱的歷史使命,兩岸同文同種,血濃於水,兩岸關係應該ùi「兩岸一家親」行向「兩岸一家人」。  

台灣的新聞評論講,chit兩年柯文哲學中國共產黨總書記習近平講「兩岸一家親」,致使原本中國國民黨連戰作兩岸「買辦」的角色,煞hō͘柯文哲搶去,chit遍郝龍斌進一步講「兩岸一家人」,緊kā兩岸「買辦」的角色搶倒轉去。錯了!   

郝龍斌想講伊講「兩岸一家人」比柯文哲講的「兩岸一家親」進一步,phô͘習近平的尻川koh khah用心用力。可惜伊m̄知「兩岸一家親」是按怎來的:2010年四月初十,習近平副主席見台灣兩岸共同市場基金會最高顧問錢復的時明確指出:「兩岸同胞是一家人」;2013年二月二五,習近平見中國國民黨榮譽主席連戰的時,猶原講:「兩岸同胞血脈相連,是一家人。」六月十三習近平見中國國民黨榮譽主席吳伯雄的時表示,咱兩黨應該以實現民族振興、人民幸福為己任,促進兩岸同胞團結合作,積極宣導『兩岸一家人』的理念。」十月初六佇印尼會見蕭萬長的時,才頭一遍正式提出「兩岸一家親」的講法,自按呢定調落來。   

「兩岸一家親」柯文哲kā習近平chit句聖旨一字無改攬tiâu-tiâu、直直唸,中國大細粒官員當然kā柯文哲看作寶、該當tio̍h kā「惜」;郝龍斌烏白改習近平的聖旨,而且是改倒轉去習近平認為無好、棄捒的話。郝龍斌有影有夠hàu-tai! 
 
< Prev   Next >