首頁 arrow 綠色短評 arrow 宋楚瑜傷膨風la̍h!

宋楚瑜傷膨風la̍h! PDF Print E-mail
Written by 李南衡   
Tuesday, 26 June 2018

六月初一,親民黨主席宋楚瑜去基隆助選的時講,最近柯Ptio̍h一句「兩岸一家親」kâng會失禮顚倒惹起紛紛的議論,事後koh轉話講是向對「兩岸一家親」感覺爽的人講歹勢,koh惹起一陣批評。宋楚瑜講,「兩岸一家親」伊宋楚瑜是原始創意人,三年前伊去中國大陸訪問的時,正式向對岸領導者談起,堅持「兩岸一家親」是「兩岸一家仇」。基隆未來的發展mā tio̍h推動兩岸相親有愛、彼此合作。宋楚瑜按呢講有影驚笑破人的嘴?

今仔日的台灣早早tio̍h m̄是中國國民黨白色恐怖時期的台灣,會tàng「一手遮天」,封鎖消息,hō͘台灣人完全m̄知台灣內面kah外面世界真正發生啥物代誌,出在獨裁統治者烏白亂講。今仔日的台灣kah自由世界大部分的國家仝款,任何人若肯用功利用科技,攏會tàng成作一個「萬事通」kah「消息靈通人士」。    

你若ji̍h「谷歌」(“google”)一下,chhōe「習近平談兩岸一家親」,會看tio̍h「人民網」整理好的一大篇文〈十八大以來,習近平12遍對台講過啥物話?〉,2013年十月初六,習近平會見蕭萬長的時講:「兩岸雙方應該堅持行兩岸關系和平發展的正確道路,倡導『兩岸一家親』的理念,加強交流合作,共同促進中華民族偉大復興。」Che是全世界第一遍有人講「兩岸一家親」,講的人是習近平。2014年二月十八習近平會見連戰的時講:「希望兩岸雙方秉持『兩岸一家親』的理念,順勢落去做,齊心協力,推動兩岸關係和平發展取得koh khah濟成果,造福兩岸民眾,共圓中華民族偉大復興的中國夢。」Che是全世界第二遍有人講「兩岸一家親」,講的人mā是習近平。2014年五月初七習近平會見宋楚瑜的時強調講:「兩岸關係和平發展是兩岸同胞順應歷史潮流作出的共同選擇。只要咱攏ùi『兩岸一家親』的理念出發,將心比心,以誠相待,tio̍h無啥物心結bē-tàng化解,無啥物困難bē-tàng克服。」    

按呢咱tio̍h知,五年前十月發明「兩岸一家親」chit句話的是習近平,第一個對蕭萬長講,四年前二月第二個對連戰講,仝hit年五月才對宋楚瑜講、伊排佇第三個。宋楚瑜到taⁿ猶m̄知影,是按怎台灣人聽tio̍h柯文哲一再講「兩岸一家親」kah「兩岸命運共同體」,會hiah呢受氣,並m̄是因為是柯文哲發明chit句話,是因為「兩岸一家親」chit句話是中國國家主席習近平傳落來的聖旨!    

宋楚瑜講伊三年前發明「兩岸一家親」chit句話,正式向對岸領導者談起的。完全亂亂講,時間差人兩年。歷史記載kah清清楚楚,發明「兩岸一家親」chit句話的人,無可能忽然間ùi習近平變作宋楚瑜。宋楚瑜傷膨風la̍h! 
 
< Prev   Next >