首頁 arrow 綠色短評 arrow 年金改革修法完成,馬英九有啥面講閒仔話?

年金改革修法完成,馬英九有啥面講閒仔話? PDF Print E-mail
Written by 李南衡   
Tuesday, 03 July 2018

六月二十半暝軍人年金改革修法過關,六月二一,蔡英文總統kah身兼總統府年金改革委員會召集人的副總統陳建仁、總統府秘書長陳菊、身兼總統府年金改革委員會副召集人的政務委員林萬億、國防部長嚴德發、退輔會主委邱國正、民進黨立法院黨團總召集人柯建銘、民進黨立法院國防委員會召委王定宇,佇總統府舉行記者會,向國人說明年金改革制度政策。

蔡英文總統kah陳建仁副總統佇致辭的時,攏koh一遍向全國軍公教人員表達歉意kah謝意。蔡總統特別提起,lak袋仔的錢比過去khah少去總是會不滿,而且若m̄是當事人真歹感受tio̍h chit款心情,對軍公教人員造成生活上的不便,伊beh代表國家向各位會失禮。雖然過程中有不滿的情緒,但是大多數的人攏會tàng體諒,證明軍公教ùi頭到尾一直tio̍h是支持國家的社會力量。所以伊也beh以總統的身分向逐個致上謝意。

是按怎年金改革chiah要緊?馬英九前總統在任的時,講幾若遍:年金改革今仔日若無做,明仔載會後悔。2013年一月三十,伊佇總統府召開記者會講,chit套已經實施幾若年的年金制度的財務,tio̍h那像一粒引線愈來愈短的炸彈,tī我落任進前猶bē爆炸,但是咱今仔日若無推動改革,軍人退撫基金會tī 2019年破產、教職退撫基金kah勞保基金攏會tī 2017年破產、公職退撫金mā會tī 2031年破產。也就是講,後任總統抑是後後任總統,早慢會抵tio̍h chit-ê問題,社會佇hit-ê期間mā會驚惶不安。   

馬英九前總統明其知年金改革無趕緊做bē使,是按怎伊八年任內無做咧?因為大多數會受改革影響的軍公教人員,抵抵是中國國民黨選舉時的鐵票,馬英九前總統得罪bē起、寧可放hō͘亂,炸彈會爆炸是後任總統的代誌。蔡英文總統佇記者會講:我tio̍h是馬英九前總統hit當時所講的後任總統。我並無任何指責伊的意思,顚倒是會tàng深刻體會伊當年躊躇的原因。蔡政府完成年金改革,ùi今年七月初一開始實施。蔡英文總統講,感謝逐個的拍拚達成「政府掛保證、安心三十年、疼惜後一代」的目標。   

過兩工,馬英九前總統講,伊卸任兩冬以來,感覺台灣變化誠大,一方面看tio̍h社會衝突對立增加,原來安定祥和的社會受tio̍h真大的干擾,特別是最近年金制度推出了後,看tio̍h公教人員生活真艱苦。   

年金改革修法完成,好bái每一個台灣人攏會使批評論斷。全台灣干單馬英九無資格,伊除了感謝以外,猶有啥面講閒仔話? 
 
< Prev   Next >