首頁 arrow 綠色短評 arrow 有智慧及無頭殼e5政治人物

有智慧及無頭殼e5政治人物 PDF Print E-mail
Monday, 13 April 2009
        因為法國總統薩可志(N. Sarkozy)有及西藏精神領袖Dalai Lama見面,引起中國相當受氣,雙方關係舞kah真歹。四月初一,利用佇倫敦加參G20會議e5機會,中國國家主席胡錦濤特別及伊會談。薩可志對胡錦濤講:無論法中關係按怎變化,伊堅持一個中國,而且西藏及台灣攏是中國領土不可分割e5一部份。佇chia咱看tioh8一個無頭殼e5政治人物。

因為伊,hou7咱想起一位有智慧e5政治人物,加拿大早前一位總理儲汝稻

(Pierre Trudeau)。一九七0年十月十三,加拿大及中國建交e5時,中國要求加拿大「承認台灣是中國e5領土」。當時加拿大總理儲汝稻應kahsui2氣,伊講:第一,台灣並m7是加拿大e5領土,加拿大無權利承認台灣是屬siang2 e5。第二,無一個國際法理論會tang3 hou7加拿大有「權利」抑是「義務」承認一個及伊無關係e5台灣主權屬siang2 e5。第三,假使加拿大若承認台灣是中國e5一部份,事實上ma7是無任何法律效果及意義,加拿大國民、飛機、船隻beh進入台灣,ma7tioh8向台灣當局申請簽證,theh8北京e5簽證根本無效。第四,加拿大若是佇國際條約頂面承認台灣是中國e5一部份,照條約加拿大就有義務派兵佔領台灣,負責ka7台灣交hou7中國。按呢敢m7是足ham3 e5代誌?第五,台灣若是有影屬佇中國,北京政權那tioh8四界去要求別國承認?像講海南島是中國領土不可分割e5一部份,中國根本be7去要求to2一國tioh8承認。假使台灣若是一塊有紛爭e5土地,中國應該去chhoe7hit塊土地有關e5當事國交涉才有國際效果。強迫無關係e5第三國承認,是完全無意義e5代誌。講kah中國無話thang應。咱會懷念chit位加拿大總理儲汝稻,主要是因為幾十年來,佇國際上像伊chiah有智慧e5政治人物實在真少。

  咱看chit幾十年來,中國政府e5頭人,無管是極左極右,抑是「當tehe5走資派」,無論to2一個,若beh及任何國家建交,tioh8一定要求hit-e5國家承認中華人民共和國是中國唯一合法e5政府,台灣是中國領土不可分割e5一部份。In無頭殼,所以be7 ka7當年加拿大政府所應in e5theh8出來看,所以ma7 be7感覺家已那會chiah呢無頭殼咧!

  Hit當時,加拿大原本主張及中國建交e5同時,ma7 beh繼續及台灣有外交關係,保留加拿大駐台灣領事館。因為hit陣中國真急beh及加拿大建交,連chit款雙重承認e5條件ma7 beh接受。可惜,hit陣統治台灣e5蔣介石堅持「漢賊不兩立」e5原則。Ui3 chiama7 kohtioh8一個無頭殼e5政治人物!(090410)
 
< Prev   Next >