首頁 arrow 綠色短評 arrow 風颱天,那有hiah濟政治閒仔話thang講!

風颱天,那有hiah濟政治閒仔話thang講! PDF Print E-mail
Written by 李南衡   
Monday, 16 July 2018

    風颱天上為難的是,tio̍h按怎決定放風颱假才tio̍h?若決定無放風颱假、第二工大風雨,絕對會hông罵死,講政府無關心人民的死活!若決定放風颱假、第二工出大日頭無半點風,會hông罵講國家失去競爭力!

台北市新北市基隆市(北北基),原本講好,若beh宣布放風颱假tio̍h三方面參照氣象局上晏的氣象預測,參詳好勢才同齊宣布,三個市步調才bē亂去。 Chit遍瑪莉亞風颱ùi台灣頭頂se̍h過,初十暗氣象預報顯示台北市、基隆市攏猶無達到停班停課的標準,台北市長柯文哲預定等暗時十點上晏hit遍的氣象預報才來宣布,基隆市長林右昌mā認為按呢好。無疑誤新北市違反三市的協議,暗時九點tio̍h先跳出來宣布第二工七月十一停班停課,希望台北市基隆市kah伊仝款;台北市基隆市無插伊,猶原等到暗時十點才宣布七月十一tio̍h上班上課。「北北基」放風颱假六年來第一遍無仝調,害三個市的市民攏gāng去。   

七月初十暗時八點中央氣象局預報資料,第二工新北市確實有幾若區平均風速七級、陣風九至十級,有符合停班停課的標準。M̄不比桃園市單獨一個市,兩冬前鄭文燦市長干單hō͘風雨特別大的復興區放風颱假。新北市若beh hō͘幾區抑是全市放風颱假,mā tio̍h三個市先參詳。新北市副市長李四川講,「防颱的目的tio̍h是以人民生命安全為第一考慮。」Che tio̍h是政治閒仔話!叼一位地方首長m̄是按呢想?三個市一向的共識煞放bē記得,新北市kā破壞tio̍h是無應該,新北市無考慮tio̍h三個市市民生活共同圈的利害關係。上簡單的例,台北市一間糼兒園有五位老師,其中四位住佇新北市,七月十一風颱假免來上班,chhun一位老師是beh按怎照顧三十個幼兒?台北市長柯文哲講,應該是狗搖尾、無應該尾搖狗;講伊無beh陪新北市放選舉假;基隆市長林右昌講,有可能因為新北市長朱立倫人佇國外,驚hông罵才緊作出全新北市放風颱假的決定;基隆市民講林右昌市長無放風颱假,決定無愛選hō͘伊。Chiah-ê攏是風颱天的政治閒仔話。   

七月初十,台北地檢署偵結三中案、舊中央黨部大樓交易案,kā前總統馬英九等六人起訴,馬英九辦公室隨時聲明回應「無意外」,批評北檢「甘願作政治拍手kah鷹犬」;馬英九佇伊的面冊回應講:「我誠平靜,因為che是早tio̍h預期會到的事,干單無想tio̍h會選擇tī風颱天下手。」Che是今年風颱天上好笑的閒仔話。拜託法官大人,若beh宣判馬英九有罪,tio̍h看一個好日仔,若有風颱警報tio̍h閃開,上好是揀一工涼爽的日。按呢馬英九才bē koh tī風颱天講政治閒仔話。若是無抵tio̍h地動,表示判馬英九有罪並m̄是啥物「驚天動地」的代誌。 
 
< Prev   Next >