首頁 arrow 綠色短評 arrow 驕傲自大的柯文哲市長!

驕傲自大的柯文哲市長! PDF Print E-mail
Written by 李南衡   
Tuesday, 24 July 2018

七月十六,民進黨桃園市長鄭文燦提起,機場捷運今年頂半年有賺兩億,上緊今年十月tio̍h會全線落價十元。台北市長柯文哲佇議會備詢的時拆白講,機場捷運賺兩億?我才無愛信咧。桃園市長鄭文燦聽tio̍h了後真客氣、皮皮仔講,台北捷運是機場捷運的大股東,隨時會使來看會計報表。第二工,台北市議員何志偉佇議會詢問柯市長敢有看過機場捷運的財務報表?柯市長應講「無」。何志偉議員問講,你無看過機場捷運的財務報表,昨昏你憑啥物講你信機場捷運有賺錢咧?柯市長應講「憑常識」。

 

憑常識?原本人攏mā認為是日頭teh se̍h地球,一直到1543年波蘭科學家哥白尼(N. Copernicus)發表《天體運行論》,才認為是地球teh se̍h日頭才tio̍h,當時真濟人「憑常識」tio̍h認為哥白尼亂亂講,想看māi,設使地球若teh se̍h日頭振動,地球頂面的人那會無跋跋倒咧?Hiah-ê人tio̍h是憑無知、驕傲自大的「常識」teh判斷teh講話。   

連馬英九前總統hiah戇的人to̍h知影,年金若無改革,2019年軍人退撫基金tio̍h會破產、2027年教職退撫基金tio̍h會破產、2031年公職退撫基金tio̍h會破產。馬政府喝八年beh拚年金改革拚無作半項,蔡英文總統上台兩年了後完成年金改革,是足了不起的代誌。中國國民黨台北市議員問台北市長柯文哲,年金改革有解決啥物問題?柯市長應講,那像無解決啥物問題。柯文哲市長若猶原是「憑」伊驕傲自大的「常識」teh講話,有影是「目睭金金,人傷重」!   

柯文哲市長因為驕傲自大,認為無人比伊khah gâu。若有人做了誠好,伊「憑常識」當然無愛信。所以,台北市長柯文哲tī五日節講起雙北交通票1,280元吃kah飽政策,hông嫌傷貴。民進黨台北市長參選人姚文智tio̍h喊出0元免費。台北市長柯文哲kā酸講「0元月票錢ùi天頂落落(lak-lo̍h)來嗎?選bē tiâu才亂喝價」。姚文智聽tio̍h反唱「柯市長干單會曉the̍h錢補貼月票,無用功、無用腦,那好意思罵人?」姚文智傷客氣,其實柯文哲市長是古井水雞,伊一定m̄知北歐巴德海(Baltic Sea)三小國之一的愛沙尼亞(Estonia),國民所得美金一萬七千八百元比咱khah少,首都塔林(Tallinn)已經實施所有大眾交通攏免費。法國巴黎市長安‧喜他果(Anne Hidalgo)當teh規劃巴黎市內的大眾交通工具攏總免費;現此時歸個德國mā teh規劃所有的大眾交通工具攏總免費。
 
< Prev   Next >