首頁 arrow 綠色短評 arrow 韃靼語爭取作俄羅官方語言!

韃靼語爭取作俄羅官方語言! PDF Print E-mail
Friday, 17 April 2009

        四月十五,根據「俄羅新聞網」e5消息,佇俄羅境內e5韃靼(Tatar)人希望韃靼語會tang3成作俄羅e5第二種官方語言。

        現此時全世界e5韃靼人大約有六百外萬,因為歷史e5緣故,che六百萬外人分散佇世界各所在,除了佇中國、中亞幾國、東歐幾國以外,ma7分散到土耳其、波蘭、芬蘭等幾國,韃靼人住佇俄羅e5上蓋濟,照二00二年俄羅人口普查結果來看,韃靼人大約有五百五十六萬人,佇俄羅一億四千二百萬人口中將近四葩。其中二百萬人住佇東歐平原in e5「韃靼斯坦共和國」,韃靼人有五十二葩,比一百三十五萬俄羅人khah濟十七葩。

        韃靼斯坦共和國原本屬舊蘇聯e5一部分,一九九0年代初期,蘇聯政局大動亂、聯盟面臨解體hit時,九0年八月三十,「韃靼斯坦」發表主權宣言,改名作「韃靼斯坦共和國」,希望脫離蘇聯及俄羅獨立,宣布除了國防以外,其他一切權利攏是共和國所有。九二年三月二一,舉行一場全民公投,結果希望獨立e5人佔全共和國選民e5六十一筢外。九四年Hit當時俄羅總統葉爾辛為tioh8 beh拍車城(Chechnya)、驚chitkoh走去,所以及韃靼斯坦共和國簽署條約,韃靼及俄羅聯邦合做夥,會使參加國際關係及對外經濟關係,佇稅收及關稅方面享有特權,hou7韃靼斯坦超出俄羅憲法所規定e5權力,也就是講,韃靼斯坦共和國雖然留佇俄羅聯邦內底,但是伊是一個有特殊性koh有特權e5國家。

照「俄羅新聞網」e5報導,韃靼斯坦社會組織提議希望韃靼語會tang3成作俄羅第二個官方語言。四月十六,《生理人報》報導講,chiah-e5組織已經開始佇全俄羅各所在收集支持chit-e5提議e5簽名,計劃ti7年底進前e5「韃靼語、世界語、母語」活動下面,收集十萬張簽名了後,將chit-e5提議以法律形式提交國家議會下院。根據韃靼青年世界論壇局主席艾辛指出,韃靼族是俄羅境內第二大民族,韃靼語自然是第二普及e5語言,而且韃靼語是俄羅及蘇聯解體後早前hiah-e5共和國「獨聯體國家」之間,以及其他國家民族之間e5交流媒介。

想起台灣講Holoe5人佔全台灣人口二千三百萬e5七十三葩,有一千六百八十萬人,Holo語竟然m7是台灣e5「官方語言」,顚倒是殖民政權中國國民黨所推拺e5所謂「國語」,也就是中國所講e5普通話作台灣e5「官方語言」,那像無人teh爭取抑是提議ka7 Holo語變作「官方語言」。一千六百八十萬 Holo人敢有影khah輸五百萬e5韃靼人?Mai3管屬to2一個政黨,Holo人立法委員敢真正攏hong5kah麻痺去ah?攏無神經去ah?我實在有小可懷疑。

 
< Prev   Next >