首頁 arrow 綠色短評 arrow 桃園市長鄭文燦按呢疼惜市民!

桃園市長鄭文燦按呢疼惜市民! PDF Print E-mail
Written by 李南衡   
Monday, 13 August 2018

 原本tòa佇花東地區的阿美族人,為tio̍h beh來台灣北部討趁,三十年前一大陣人盤山過嶺,來到原本的桃園縣大溪鎮大漢(Tōa-ko͘-hām)溪邊停腳落來,形成一個「崁津部落」,目前有四十九戶、兩百五十名居民。

In靠tio̍h原住民的本能佇樹仔腳、佇溪溝chhōe水源,總是水質無好,干單會tàng作洗盪用,飲食的水tio̍h去買礦泉水。因為自來水的線管設置無簡單,當然mā因為成本傷懸,一直無法度為in來牽自來水線管。鄭文燦市長就任以後,積極協調拜託國際扶輪社鬥相仝出三百萬,設計規劃挖井取水,經過五遍的挖井,才佇一百0五公尺深的所在chhōe tio̍h水源,井水水質比自來水koh khah清氣、實在真意外。Hit口井每日會tàng供應九十噸的清氣水,另外挖蓄水池貯四十噸的清氣水,拍起來的水就koh有設備簡易的自來水系統,kā清氣水送到家家戶戶。   

除了「崁津部落」以外,佇大溪區猶有二十年前遷徙來大漢(Tōa-kou-hām)溪武嶺橋附近的溪邊河階地的阿美族原住民,有十五戶、五十四人,形成一個「撒烏瓦知部落」;猶koh有原本tio̍h tòa佇桃園縣復興鄉(角板山)的泰雅族“Rahao”社原住民,in kah新北市烏來區、新竹縣尖石鄉的“Rahau”社原住民仝一支,約有一千一百五十人,編入復興區羅浮里,平時in所飲的靠山坑仔水,風颱落大雨山坑水濁kit-kit,tio̍h無清氣水thang飲。桃園市政府佇chit三個所在增設三個加壓站,hō͘分散佇三個部落的原住民攏有清氣水thang飲。   

桃園市政府希望會tàng hō͘ 遷徙來桃園市的原住民上基本的生活條件,除了hō͘ in有清氣的水thang飲、做到「用水正義」以外,供應電、設門牌, hō͘來tòa佇桃園市的人攏會tàng有安全、安穩、衛生的生活環境。鄭文燦市長答應beh為in增設消防設備、建設道路系統、hō͘ in tòa的所在佇會tàng khah舒適。   

原本一日到暗hông趕來趕去的都市邊緣外來住民,因為in所tòa的所在,是佇大漢(Tōa-kou-hām)溪水路治理用地的範圍線內底,桃園市政府認真去交涉了後,經濟部水利署已經規畫調整水路治理範圍線;桃園市政府mā請求水務局佇溪邊興建poh岸,維護in的安全。鄭文燦市長hō͘ in會tàng安心tòa落來。真清楚,伊當然m̄是為tio̍h後一遍選舉考量,算khah真的,「崁津部落」才兩百五十名居民,有選舉權的我看無兩百個;「撒烏瓦知部落」koh-khah少,才五十四個人niā-niā,有選舉權的我看無三十個。若是為tio̍h選舉,何必要為tio̍h兩百外票拚kah chit款。值得咱呵咾的是,鄭文燦市長疼惜小數中的小數市民,疼借弱勢中的弱勢市民,疼惜ùi花東遷徙來桃園的原住民。 (180810)
 
< Prev   Next >