首頁 arrow 綠色短評 arrow 柯文哲亂講「兩岸一家親」!

柯文哲亂講「兩岸一家親」! PDF Print E-mail
Written by 李南衡   
Wednesday, 22 August 2018

八月十一,「美麗島電子報」董事長吳子嘉接受訪問的時講,台北市長柯文哲的兩岸論述搖來顯去,是因為伊自信無夠。隔日,柯文哲接受訪問的時講,伊家己的兩岸論述攏非常確定,「兩岸一家親tio̍h是現階段基調」。伊講,「兩岸一家親」無牽涉tio̍h政治,he是文化、經濟、民間kah城市交流。柯文哲koh講,無可能歸個國家前途寄託佇人的善意頂面,像講經濟上tio̍h應該準備做好勢,所以伊猶原無主張兩岸雙方講歹聽話,愈舞愈ngē

柯文哲講的干單「伊家己的兩岸論述攏非常確定」chit句話講tio̍h niā-niā。「非常確定」伊完全照中國共產黨總書記習近平的聖旨宣讀。「兩岸一家親」若是柯文哲發明的,咱bē hiah呢受氣,親像伊發明的兩岸關係那像翁某「床頭拍床尾和」,咱極加笑伊三八話烏白講,去上海一工tio̍h kah人peh起去眠床頂。柯文哲講「兩岸一家親就是現階段基調。」連chit句話mā是習近平講的。   

2013年十月初六習近平「兩岸一家親」的聖旨宣讀了,2014年三月初三,中國全國政協主席俞正聲佇政協工作報告中講,2013年全國政協全面貫徹兩岸關係和平發展重要思想,加強kah台灣有關社會組織kah團體的友好交往,大力宣導「兩岸一家親」理念。中國總理李克強佇政府工作報告中重申中國對台工作的大政方針,明確現此時中國官方對台工作「兩岸一家親」的具體思路,表達了對兩岸關係和平發展,成作不可阻擋、不可逆轉的歷史潮流。按呢,柯文哲講「『兩岸一家親』無牽涉tio̍h政治」,是目睭金金人傷重的人才講會出來的話。而且柯文哲所講的建構「兩岸命運共同體」hit句話,是習近平的另外一道聖旨。   

六月三十,台北市長柯文哲新冊《光榮城市》舉辦第一場簽書會,冊的內文koh再為「兩岸一家親」、續辦雙城論壇的兩岸立場辯護,伊講「Tī chit-ê時陣,猶teh攻擊『兩岸一家親』講法的政治人物,干單想beh凸顯個人政治意識、奪取個人政治利益,根本無顧tio̍h台灣的安危。」柯文哲hiat出來chit頂帽仔傷恐怖,無人戴會起。人kā柯文哲的siáu鬼仔殼掀掉,tio̍h承受hiah重的罪名?其實柯文哲所指責的,khah親像伊本人用鏡照家己teh罵家己。   

咱攏猶會記得,舊年台北市長柯文哲去上海,佇雙城論壇中講「兩岸一家親」kah建構「命運共同體」惹起真濟議論。當時,柯文哲堅持講伊的講稿有先送hō͘國安會,意思是講國安會tio̍h為伊chit兩句話背書。一年後的今年七月初四,接受媒體訪問的時講,當時送hō͘國安會的講稿中,並無chit兩段,柯文哲講,「是後來加的」。Che是家己講伊是一個誠實的人,真罕得講白賊的柯文哲講的。 (180817) 註:「兩岸一家親」 「兩岸命運共同體」 習近平 請用華語唸
 
< Prev   Next >