首頁 arrow 綠色短評 arrow 中國國民黨的良心-王可富律師

中國國民黨的良心-王可富律師 PDF Print E-mail
Written by 李南衡   
Wednesday, 22 August 2018

 

 2018年七月初十中晝新聞報導,前總統馬英九、前中投董事長張哲琛、前中投總經理汪海清、前立法委員蔡正元、蔡正元的牽手洪菱霙、丈人洪信行等六個人,因為三中案、舊中央黨部交易案hō͘台北地檢署起訴,媒體報導,提出告訴的人是馬英九的老父馬鶴凌在生的好朋友、法律顧問王可富,2016年一月十六,伊佇媒體人胡忠信陪同之下,去臺北地方法院按鈴控告馬英九、朱立倫kah林德瑞等人詐欺中國國民黨黨產近2000億,涉詐欺、背信罪。


 

台北地檢署根據掌握tio̍h的關鍵事證,認定中國國民黨佇出售中視、中影、中廣股權kah舊中央黨部大樓涉嫌俗賣,損害中國國民黨持有的上市控股公司中央投資股份有限公司的利益,當時擔任黨主席的馬英九完全知情,所以今仔日全案偵結了提出起訴。報導講,2016年提出告訴hit當時,八十九歲的王可富律師,是一位有五十七年資歷的中國國民黨老黨員。   

王可富律師痛心批判chiah-ê中國國民黨所謂的黨產,事實上是ùi人民手內搶去的,應該還hō͘人民、kah幫助弱勢者。像講國家發展會的土地,是情治人員用六響仔銃kā伊移轉去hō͘中國國民黨的;桃園大溪國防大學的土地,mā是中國國民黨ùi老百姓手中搶去的,猶有佇世界各國真濟中華民國以前的大使館kah總領事館,mā攏變作黨產。王可富講,中國國民黨黨產的來源kah流向不明不白,希望會tàng清查出來,還人民chhun的the̍h來幫助孤兒、老人等弱勢民眾。  

 2016年五月初二,立法院司法kah法制委員會召開「促進轉型正義條例草案」公聽會,中國國民黨資深黨員、人權律師王可富有去參加、真誠懇講,中國國民黨的黨產是硬硬搶奪台灣人財產得來的,身為一個中國國民黨員mā看bē落去,「我為tio̍h正義向各位自首」。   

王可富koh指出,六十外年前中國國民黨佇台灣掠兩萬名原住民、河洛人kah客人去中國拍共匪,最後干單chhun兩千五百人轉來到台灣,中國國民黨當局卻認為in有一部分是「共產黨」,kā in起訴,法院竟然mā認定in m̄是軍人。王可富律師氣phut-phut講:「Chiah-ê台灣人為中華民國phāiⁿ銃去相戰,講in m̄是軍人,敢講坐佇冷氣房上班的才是軍人?」

有人感覺真奇怪,錢有m̄驚世事、講話鬥大聲的中國國民黨,那會敗kah今仔日chit款?是因為中國國民黨真濟人、特別是做頭的,良心攏hō͘狗咬去;有人問講既然按呢,中國國民黨那會猶未倒?是因為中國國民黨內底猶有一寡親像王可富律師chit款的黨員,良心無hō͘狗咬去的。你講tio̍h m̄ tio̍h? 
Last Updated ( Wednesday, 22 August 2018 )
 
< Prev   Next >