首頁 arrow 綠色短評 arrow 馬英九所講e5「馬上好」!

馬英九所講e5「馬上好」! PDF 列印 E-mail
2009/04/27, Monday
        舊年總統大選e5時,馬英九用伊e5姓喝出一個競選口號:「馬上好!」有雙關意思,一個是講若hou7伊當選總統,台灣就會「隨時好起來」;另外一個意思是馬英九若「上」任作總統,台灣就會好起來。伊緊 koh theh出一個數字「六三三」來作口號,講若是hou7伊當選總統,台灣e5經濟成長率會達到六葩以上,國民所得會超過美金三萬箍以上,整體失業率會落kah三葩以下。老實講,chit塊餅畫了不止美,致使真濟戇台灣人煞hou7伊騙去。

        二00八年第一季猶是阿扁總統執政,經濟成長率六點二五葩,馬英九上台了後mai3講六葩、五葩、四葩、三葩、兩葩、一葩,連0成長都顧be7-tiau5,二00八年全年變作負一點0二葩。馬英九政府原本講二00九年會khah好,講經濟成長率會達到一點六四葩,外國一大堆銀行及研究機構預測二00九年台灣經濟會土土土,台灣中經院預測二00九年經濟成長率是負三點五九葩,香港渣打銀行預測負三點五葩,經濟學人預測負九葩,馬政府才緊修正講是負二點九七葩。阿扁總統及民進黨政府hou7中國派媒體罵kah無一點好,其實,經濟成長率除了二00一年負二點二葩以外,0二年到0七年是四點六、三點五、六點二、四點二、四點九、五點七葩。那是馬英九政府所會tang3比並e5

  失業率ma7真驚人,馬英九上台十一個月,那像誠gau7e5竹仔,一節一節高升,Ui3二00八年五月就任e5三點八四葩,一直升到十二月破五葩來到五點0三葩,今年三月已經變作五點八一葩,失業人數ui3二00八年五月e5四十一萬六千人,到今年三月已經超過六十三萬人。馬英九政府怪東怪西、怪國際情勢,咱看今年三月香港失業率是五點二葩、韓國是三點七葩。今年二月日本是四點四葩,台灣是五點七五葩。若照民進黨所做e5調查,講民眾心目中真正e5失業率是九點三葩。Koh khah hong5煩惱e5是五月至八月有今年e5畢業生beh投入職場,失業率會koh peh懸,失業率恐驚會衝到七葩。根據自由時報e5調查,現此時有工課e5「上班族」內底有七成e5人驚會無頭路。

  馬英九講伊若上台,台灣國民所得會達到美金三萬箍,hiahe5夢免想!事實上是食頭路人e5實質平均薪資大kiu水,已經kiu到十七年來上蓋低,二00七年新台幣六萬一千七百五十二箍,二00八年變作六萬五百七十五箍,今年會落到五萬三千一百九十五箍,比舊年負成長十二點一八箍。

  「馬上好」e5意思是「馬仔家己上好」,大多數e5台灣人摔落馬腳teh hou7 chit隻馬烏白踢、濫摻踏。Chit陣才知影一票tng3 m7 tioh8會差hiah濟!

 
 
< 前一個   下一個 >