首頁 arrow 綠色短評 arrow 《台灣旅行法》對台灣意義lōa-nī大!

《台灣旅行法》對台灣意義lōa-nī大! PDF Print E-mail
Written by 李南衡   
Monday, 15 October 2018

《台灣旅行法》是一部美國法律,分別由美國眾議院kah參議院tī 2016年九月提出,2017年一月kah五月重新提出,參眾兩院通過了後,今年(2018)三月十六由Trump總統簽署生效,是beh促進台灣kah美國之間的高層級交流。

 

照眾議院的版本,《台灣旅行法》內容規定,美國佇政策上應該允淮所有層級的美國官員去台灣,而且kah相對應的台灣政府官員會面;mā允准台灣政府官員進入美國,佇適當尊重條件kah美國官員-包括國務院·、國防部以及其他內閣機構官員會面。咱攏知影,以前美國的官員bē-tàng來台灣kah咱相對的政府官員會見,咱的政府官員mā bē-tàng去美國kah in相對應的政府官員會面。第二點,鼓勵駐美國台北經濟文化代表處kah台灣政府佇美國成立的機構,會使佇美國進行正式活動。咱攏知影,以前咱駐美國的外交人員連美國國務院小小一個主管都見bē-tio̍h,佇美國那像媳婦仔、那有sêng外交官咧!   

參議院的版本,kah眾議院版本大部分仝款,但是明確授權美國政府所有層級官員,包括內閣級的國家安全官員、軍官kah其他行政部門官員,會使前往台灣kah相對應的台灣官員會面。Koh要求美國國務卿tī法律制定後一百八十工內、kah以後每一百八十工tio̍h向參眾兩院的外交委員會提交報告。  

 佇美國的「台灣人公共事務會」(FAPA)認為,美國國會知影台美之間的溝通模式beh繼續維持區域和平有不足的所在,才會訂chit-ê法案。蔡英文總統kah全體台灣人表示感謝美國支持台灣的民主,chit-ê法案對加強台美關係有幫助。   

Tī法案通過、美國Trump 總統猶未簽署生效進前,中國外交部發言人陸慷tio̍h表示堅決反對,伊講有關法案極度違反一個中國政策kah中美三個聯合公報確立的原則,干涉中國的內政。中國社會科學院研究員王鍵講,chit-ê法案是武力統一台灣的好藉口,美國Trump 總統一旦簽署chit-ê法案,中國tio̍h會照《反分裂國家法》攻打台灣。今年三月十六美國Trump 總統簽署《台灣旅行法》生效了後,中國外交部發言人陸慷tī hit暗隨時發表聲明:「阮對美方簽署『kah台灣交往法案』表示堅決反對,已經向美方提出嚴正交涉。伊嚴重違反一個中國原則kah中美三個聯合公報規定,向『台獨』分裂勢力發出嚴重錯誤信號。阮對che堅決反對。中方敦促美方糾正錯誤,停止美台官方往來kah提升實質關係,慎重仔細處理涉台問題,以免對中美關係kah台海地區和平穩定造成嚴重捐害。」  

 干單看中國的反應,跳愈大力、罵愈大聲,咱tio̍h知影chit-ê法案對台灣意義lōa-nī大!
 
< Prev   Next >