首頁 arrow 綠色短評 arrow 歹年冬厚siáu人!

歹年冬厚siáu人! PDF Print E-mail
Written by 李南衡   
Thursday, 25 October 2018

2007年香港股市「恆生指數」一個半個月內起將近四成(八千點)、散戶起siáu認購新股。2008年一月初的27,800點到一月二二落到21,700點,二十工跋6,000外點(bat有一工跋2,000外點)。九月十五日,雷曼兄弟破產引起大亂,「恆生指數」短短三工跋二千點。十月「恆生指數」跋愈厲害,萬六、萬五、萬四、萬三削到12,000點,年底最後以14,387點作結朿,全年攏總跋48.1%

過年了,香港真濟人tòa入去「siáu病院」。院方特別為chiah-ê新患者準備一大塊烏枋,頂面有香港主要股票名稱kah價數,每早起有人隨時佇烏枋頂改價數,幾百個「投資者」逐早起乖乖坐teh看股票起落,叼一股起一元以上,隨時引起笑聲;叼一股跋一元以上,隨時有人啼喃哭淚。為tio̍h安慰患者,全世界干單chit間siáu病院烏枋的股票起濟落少,歸個趨勢是逐工攏有teh起。   

2016年五月十九,馬政府落任前,台灣股票是8,095.98點;Bat作過馬政府經濟部長的尹啟銘講馬英九若當選總統上台,台灣股票會上兩萬點。真歹勢,馬英九執政兩任八年,m̄-bat peh bē起去一萬點。尹啟銘事後解說講he是選舉語言、是講笑。蔡英文總統上台無兩年,2018年五月初四大盤tio̍h來到10,529.37點,台股市值也mā ùi 23.91兆提升到31.49兆,大大增加7.58兆。   

今年十月十一,台灣股市跋660.72點,收9,806.11點,頭一遍跋破一萬點。中國國民黨立委賴士葆講,台股除了受國際股市拖累以外,蔡英文總統十月初十談話,mā影響tio̍h投資者對股市的信心。伊直剥講,tio̍h是因為國慶演講「正式挖(iah)出兩國論,正式行向台獨,向中國起空。」蔡英文總統兩國論的威力那會hiah大?M̄-nā按呢,蔡總統初十早起演講,hit暗(美國時間初十早起)美國股市跋kah mi-mí-mauh-mauh:Dow Jones工業指數跋831點、NASDAQ綜合指數落315點。Koh khah厲害的是,蔡英文總統的兩國論,連中國上海kah深圳的股市mā倒翹翹:上海、深圳兩個城市的股票全面大跋,A股總市值ùi十月初十的四十六萬七千六百億落到十月十一的四十四萬一千億,市值一工消蝕兩萬六千六百億。按呢你tio̍h知影,明明是賴士葆立委teh練siáu話。 .  

十月十一,台北股市收9,800點、跋破一萬點。有人佇網路頂面講chit聲台北股市若beh koh peh上一萬點,tio̍h koh等二十年。第二工,台北股市tio̍h 以10,045點收盤。那像目一下nih一工變二十年。咱知影,正常的股市那像大樓的電梯有起有落。怪蔡總統講一句話台灣股市tio̍h大跋,是teh煉siáu話。 食傷飽煉siáu話的人m̄是siáu人,無是啥?
 
< Prev   Next >