首頁 arrow 綠色短評 arrow Chit款相當「強」e5政府!

Chit款相當「強」e5政府! PDF Print E-mail
Friday, 08 May 2009

中國國民黨殖民政府行政院長劉兆玄ti7五月初六接受兩間電視台訪問e5時,自我評斷目前e5內閣是相當「強」e5團隊。聽一下,害我「強強」beh笑出來。你敢知in「強」佇to2位?

Chit-e5家己講相當「強」e5團隊,是m7是指in執政teh beh一年,就有法度hou7台灣e5經濟成長率那坐流籠ui3六點二五葩溜到負一點0二葩?甚至會溜到in家己估算e5負二點九七葩?Chit-e5家己講相當「強」e5團隊,是m7是指in執政teh beh一年,就有法度ka7台灣e5失業率ui3三點八四葩舞到五點八一葩、失業人數增加二十二萬人?che猶無ka7一寡m7敢辭頭路、放「無薪假」e5人算在內。Chit-e5家己講相當「強」e5團隊,是m7是指in執政teh beh一年,就有法度hou7食頭路人e5實質平均薪資大kiu水,kiu到十七年來上蓋低?

劉兆玄院長心臟有「強」,be7見笑到無程無度,伊講:「我e5感覺ti7 chit-e5時間點,內閣就是講m7是上強e5ma7是相當強e5團隊。」台灣人已經悽慘落魄到chit款,猶講是相當「強」e5團隊,借問一下,若m7是一個親像chit款相當「強」e5團隊,咱e5生活會變作啥款?世間敢猶有比現此時chit號政權koh khah au3 e5團隊?伊講,最近去中南部,拄tioh8民眾攏對政府喝加油,hou7伊心中誠感動。咱m7知影伊teh感動啥物碗糕,一個真正「強」e5內閣,民眾絕對be7 ka7喝加油,民眾應該是滿面春風,歡頭喜面向行政院長說謝才tioh8!民眾會ka7行政院長喝加油,實在是真驚chit號政府隨時火會hoa去!koh khah奇怪e5是,in「強」beh及中國簽啥物ECFA,民眾聽tioh8「會koh-hoa」,驚kah phi7-phi7-choah,台灣人e5心臟「強強」beh 恬去!

  比起chit款相當「強」e5內閣,馬英九總統會使講是足「強」,佇伊主政下面,「強」向中國hit旁敧過去,台灣e5主權「強」beh流失了了;藍營e5立委佇立法院「強」beh修正集會遊行法,就是beh ka7台灣人「強」用腳鍊手銬朿縛起來;馬英九執政teh beh一年nia7-nia7,美國「自由之家」評斷,台灣e5自由已經退步去ah!特偵組用「莫須有」e5理由「強」ka7阿扁前總統收押,Ui3十二月三十到五月初六拄拄一百二九工,日本殖民統治台灣e5時,收押嫌犯上久be7使超過二九工,所以才有「拘留二九工」chit句話。中國國民黨殖民統治者收押阿扁前總統,已經比日本殖民統治者上限加一百工ahm7甘願放人。

  馬英九政權「強」beh及台灣人作對,害台灣人「強強」behbe7落去,「強強」beh死,「強強」beh掠狂ah

 
< Prev   Next >