首頁 arrow 綠色短評 arrow M̄怪亂舞、m̄怪貪污,干單怪風水!

M̄怪亂舞、m̄怪貪污,干單怪風水! PDF Print E-mail
Written by 李南衡   
Monday, 29 October 2018

   前南投縣長李朝卿hông控告貪污,今年十月中hông判重刑九十八年定讞、十月二五入去坐監。十月二二,現任縣長林明溱佇縣務會議中,koh再提起縣政府大樓修建計畫,希望會tang kā厝頂三角尖造型改作圓的,因為chit-ê三角尖厝頂已經有連續害三任縣長出代誌,攏是因為縣政府大門口頂頭的三角形厝頂,佇風水上來講是比較khah不吉利,預定伊改作圓形,希望日後會tàng事事圓融,幸福圓滿。現在的南投縣政府大樓是1999年九二一大地動了後,由當時的彭百顯縣長所起的。

 

南投縣林明溱縣長所講的chit-ê三角尖厝頂,到底害三位縣長出啥物代誌?彭百顯是南投縣頭一個m̄是中國國民黨籍的縣長,伊1998年當選縣長隔轉年發生九二一大地動。彭百顯hông控告涉嫌虎山農場臨時辨公大樓、農村道路、傢具設施工程等幾件賑災款kah重建工程弊案圖利廠商。2000年十一月初四hông收押六十一工,2001年一月十三才koh復職,初審判伊有罪,不服上訴,第二審、第三審改判伊無罪,無罪的理由是:彭百顯是依照緊急命令批示限制性招標,有合法令,並無圖利廠商。Chit-e官司一下纏tio̍h kā彭百顯纏十年,到2011年七月十五,最高才判決彭百顯無罪確定。借問,一個人一生有幾個十年?Che tio̍h是in中國國民黨家己講的「法院是咱開的」代表作之一而已,明明是中國國民黨亂舞、凌遲人的代誌,kah風水有啥物關係?  

 另外一位縣長是民進黨的林宗男,照現任縣長林明溱所講的「出代誌」,是林宗男縣長任內遭受tio̍h檢察官去chhiau伊的厝、去chhiau伊的辦公室,結果啥物mā無 chhiau tio̍h,伊那有出啥「代誌」?是中國國民黨政府亂舞。  

 第三位是李朝卿縣長,2011年八月初六至初十的「八八風災」,一般叫作「莫拉克(Morakot)風災」,tī李朝卿縣長第二任任內,因為伊涉嫌佇莫拉克風災重建案kâng討紅包收紅包,2012年十一月三十,hō͘南投地方法院裁定羈押,李縣長的職務ùi hit日起依法停職,由陳志清代理到2014年十二月二五。2013年三月二六本案起訴,2015年八月三十一,本案佇南投地方法院一審判決三十年有期徒刑、褫奪公權十年。2018年十月十八,最高法院宣告李朝卿九十八年徒刑定讞,十月二五入去坐監服刑,照咱的法律有期徒刑上濟關三十年。  

 現任南投縣長林明溱講tio̍h縣政府三角尖厝頂風水若hiah呢bái,伊一任四年作teh beh滿,是按怎猶未出代誌咧?事實上是,若中國國民黨政府mài烏白舞、中國國民黨的縣長mài貪污,啥物形的厝頂mā bē出代誌!
 
< Prev   Next >