首頁 arrow 綠色短評 arrow  咱是beh選台北市長、抑是beh選「媽寶」?

 咱是beh選台北市長、抑是beh選「媽寶」? PDF Print E-mail
Written by 李南衡   
Wednesday, 14 November 2018

 十一月二四,有一個「媽寶」beh競選連任台北市長。選「媽寶」,敢好?

  「媽寶」是啥?「媽寶」就是一個大人猶koh逐項事聽in老母的意見,那像一個猶未斷奶的大漢嬰仔,一個醫學院畢業了已經teh作醫生ahbeh娶啥物人作某、猶kohin老母決定。「媽寶」欠缺獨立思考,像講中國講啥伊tio̍h講啥;無自信,敢大聲替「婦聯會」講話,逐個指責了煞講「坦白講,婦聯會teh創啥,我無清楚。」無責任感,像講作市長的人違法,無檢討家己煞顚倒講法律有問題,tio̍h修改法律。

 

「媽寶」後壁有一個真強的「虎媽」。柯文哲作台北市長了後,in老母何瑞英逐個叫伊「柯媽媽」,攏無掩蓋表現出伊了不起的「虎媽」本色。2017年二月過年新正,伊會tàng拍電話向台北市四百五十個里長拜年;2017年十月,因為名嘴周玉蔻講柯媽媽佇飯店kah台北市警察局長陳嘉昌見面,批評講首長厝裡的人去bak tio̍h市政府的人事,那像是地下市長。柯媽媽彈倒轉講周玉蔻「食人夠夠,會hō͘天kā責罰。」今年九月底,政論家楊憲宏講有一工佇呂秀蓮副總統官邸聚餐,柯文哲講佇中國宴席了後會有一齣m̄是真正的「甜點」,是一份「花名冊」,人客點了,「甜點」會送去人客的房間。事後柯媽媽無罵呂副總統、mā無罵楊憲宏,揀軟的周玉蔻來罵,講「阮子是上有品的,伊自細漢我養kah大,我那會m̄知?」話一下轉,罵周玉蔻講「我mā驚伊,出在伊罵lah,hō͘伊罵kah伊家己倒落去為止。」今年十月中,民進黨台北市長候選人姚文智,罵柯文哲市長是「潑猴耍無賴」。幾工後,柯媽媽唱聲講:姚文智上無路用,學問beh按怎kah阮子比?姚文智回應講:今仔日是重(tiâng)陽,祝柯媽媽老人節快樂!   

一個正常的縣市長抵tio̍h批評議論,正確的回應方式是公開說明解說,那有人親像柯文哲市長按呢,bih佇老母的裙裾後壁,由老母出面放砲攻擊人?一個

「虎媽」嫌無夠,koh掠in囝仔的老母-柯夫人陳陳佩琪出來鬥。伊佇面冊表示不滿講,無論是情人節放煙火、抑是跨年晚會,攏是由某一間電視台得標,但是chit間電視台卻歸工利用節目對柯「罵kah飽」,伊酸柯「實在是in上大的衣食父母neh!」柯市長kā in某講,以後會要求觀傳局的招標案,一定tio̍h愛確實做到公平、公正,公開。咱市民懷疑,是m̄是罵台北市長的電視台攏bē使得標市政府的標案?抑是任何得tio̍h台北市政府標案的電視台攏bē使罵台北市長?  

 十一月二四,若是beh選「媽寶」你選柯文哲無話講,若是beh選台北市長,慎重推薦姚文智。
 
< Prev   Next >