首頁 arrow 綠色短評 arrow 馬英九總統koh teh「嘴念經」!

馬英九總統koh teh「嘴念經」! PDF Print E-mail
Wednesday, 20 May 2009

     Ti7馬英九就任總統teh beh一年e5五月十四,伊佇台北賓館簽署兩項國際人權公約:「公民與政治權利國際公約」、「經濟社會文化權利國際公約」。伊強調就任後e5願景就是beh ka7台灣打造作一個世界級人權環境。過去戒嚴時期,確實有無符合chit兩項公約e5所在。今仔日完成簽署兩個國際公約,「台灣佇人權議題頂面ma7是到『轉大人』e5時陣。」

        咱攏知影,ti7戒嚴時期中華民國政府m7但是聯合國會員國、猶koh是安全理事會理事國,m7是馬總統所講「有無符合chit兩項公約e5所在」nia7-nia7,根本是大大違反chit兩項公約。Hite5蔣介石政權e5立法院m7敢批准、蔣介石總統m7敢簽字通過,雖然是獨裁政權,猶koh有淡薄仔知見笑。台灣解嚴了後,經過李登輝、陳水扁兩位前總統相續拍拼將近二十年,hou7台灣e5人權民主自由改頭換面,到阿扁總統八年做了,台灣已經成作世界人權民主自由e5典範,咱上歡喜e5是已經十外年m7-bat佇街路頂面看tioh8警察拍人ah

  悲哀啊悲哀!馬英九總統就任猶無一冬,因為中國一個特使陳雲林來台灣,馬英九及中國國民黨政府那像看tioh8 in祖公,不准台灣人佇公共場所夯國旗,不准台灣人穿「我是台灣人」hit種衫,咱佇電視頂面看tioh8警察拍人,搶人手裡e5國旗、強關人唱片行e5鐵門等等。Koh khah嚴重e5是烏白掠民進黨卸任及現任e5官員,掠去關假e5關爽e5。完全無ka7人權、自由、民主囥佇心肝內。Hou7台灣e5人權民主自由退一大步。

  咱攏猶會記得,出手beh拍前駐日代表許世楷先生、ui3後壁用腳cham3阿扁前總統hit-e5蘇安生,無論ui3 to2一個角度來看就是thun2踏別人人權e5「暴力分子」。馬英九總統就任了後e5第一遍國慶日大典,hit-e5暴徒竟然是「貴客」!明明beh hou7台灣人看出馬英九嘴teh講人權民主自由nia7-nia7

  五月十四,馬英九佇台北賓館簽署「公民與政治權利國際公約」及「經濟社會文化權利國際公約」e5同時,佇賓館外面抗議e5群眾,有hou7警察拍tioh8e5、有hou7警察掠入去派出所「歇睏」e5,也有一陣群眾hou7警察擠去壁角be7be7e5。按呢若就是馬總統所講e5台灣佇人權頂面teh「轉大人」,我看大人是轉be7過,台灣人權chit-e5囝仔會變作m7成人、會be7飼得!

  一個人斯斯文文、嘴講kah誠好聽,心肝卻是足惡毒,所做e5代誌be7見得眾,咱台灣人講chit種人是「嘴念經」。馬英九就任總統che一年,hou7咱印象上深e5是,伊一擺koh一擺teh「嘴念經」。(090515)

 
< Prev   Next >