首頁 arrow 綠色短評 arrow 台北市長,你是beh選中國抑是beh選台灣?

台北市長,你是beh選中國抑是beh選台灣? PDF Print E-mail
Written by 李南衡   
Wednesday, 21 November 2018
十一月十三,台北市長選舉chhun十工niā-niā,台北《自由時報》忽然間刊出一個消息,講台北市長柯文哲原本遙遙領先,卻因為「韓流效應」kah「小野事件」煞hō͘中國國民黨參選人丁守中jiok tio̍h。對chit項代誌,傳說講總統蔡英文十一月初某一暗,有佇總統官邸召開選戰會議,有參與會議的人士透露,台北干單確定「丁無贏」,對綠營來講tio̍h無輸。《自由時報》是引用《鏡週刊》報導講,有一位參與開會的人士透露,這是因為姚文智離勝選有一段距離,而且台北「真久攏無成作話題ah」,只要確定「丁無贏」,對綠營來講tio̍h無輸。

 

好佳哉,hit下晡總統府發言人林鶴明表示講,總統m̄-bat佇官邸舉行有關該媒體所報導的會議kah討論內容,相關報導內容攏m̄是事實。

Che是一個放屁的消息。講「有一位參與開會的人士透露」是按怎無報名,敢放屁m̄敢作屁主?Che tio̍h是典型的謠言。是按怎《自由時報》無kā伊囥佇「謠言終結站」、咱上呵咾的一個專欄?

Chit遍台北市長的選舉,根本m̄是叼一黨對叼一黨,是中國對台灣。   今年八月初三丁守中PO文為「中國人」宋芸樺贊聲講「兩岸都是一家人」。 今年八月初七丁守中家己piak講伊kah中國共青團交往密切,中國共青團團員有八千一百二十四萬外名,胡耀邦、胡錦濤、李克強攏bat作中國共青團中央書記處第一書記,m̄知伊kah叼一位交往密切?伊講beh kah中國統一,是「三民主義統一中國」。2018年伊猶teh喝chit種口號,摸伊的額頭看有發燒無?   

柯文哲koh khah害!伊第一遍去上海喝「兩岸一家親」,無人知影伊到底teh喝啥,第二遍去上海koh大聲喝,逐個才好奇伊是teh喝啥?原來「兩岸一家親」kah建構「兩岸命運共同題」chit兩句話,攏是中國共產黨總書記習近平喝出的,而且是伊對中國kah台灣關係所訂的基調。今年五月十五,柯文哲接受訪問的時koh再強調,「『兩岸一家親』是我的基調」。瞞騙台灣人講,「兩岸一家親」無牽涉tio̍h政治,he是文化、經濟、民間kah城市交流。莫怪有真濟人罵伊是「柯萊兒」(英語Ko Liar)台灣話是「白賊柯」。柯文哲那像狗直直向習近平搖尾,中國的中央電視台特別為柯文哲作兩分半鐘的介紹推薦。   

所以,無論你選丁守中抑是柯文哲,攏是teh選中國。干單姚文智敢大聲喝“Taiwan Taipei”m̄是in喝的“Chinese Taipei”;干單姚文智敢喝「首都選舉是抗中保台」。你若是beh選中國,丁守中、柯文哲兩人出在你選攏無差。你若是beh選台灣,當然tio̍h選姚文智。姚文智當選對台灣人、對綠營來講才算嬴!
 
< Prev   Next >