首頁 arrow 綠色短評 arrow Chit遍九合一大選,民進黨穿美國西裝-大軀(輸)

Chit遍九合一大選,民進黨穿美國西裝-大軀(輸) PDF Print E-mail
Written by 李南衡   
Tuesday, 27 November 2018
 十一月二四,台灣九合一大選,結果hō͘真濟人感覺意外kah失望。為啥物做了誠好的台中市長林佳龍那會輸hō͘盧秀燕,chit幾年來台中的建設逐個攏有看tio̍h,特別是chit遍台中的「花博」辦了足好,伊的拍拚是按怎無得tio̍h市民的認同kah支持?民進黨佇高雄執政二十年,經過歷任市長的規畫拍拚,hō͘高雄變一個款,變清氣變現代化變交通利便,高雄人敢無感受tio̍h?有人講二五歲以下的少年人認為in bat代誌以來,高雄tio̍h是按呢。好,二五歲以上的高雄人敢記得「又老又醜」的高雄?一個佇高雄生長、作代誌四十八年久的陳其邁是按怎會輸tòa無一年的韓國瑜?一個瞭解高雄、有完整市政計畫的陳其邁,是按怎會輸完全m̄-bat高雄憑伊ká一陣狂風空嘴哺舌的韓國諭?民主制度tio̍h是人民作主、人民決定的選擇的,咱無話講,祝福高雄人續落去的四年會tàng過得平安快樂。六都原本民進黨執政的四都,好佳哉猶顧有tiâu桃園市kah台南市。

包括新北市在內,原本中國國民黨執政的新竹縣、苗栗縣、南投縣、台東縣四個縣、kah半中國國民黨執政的花蓮縣,chit遍大選一個都無拍加落;原本民進黨執政的縣市,講是「民主聖地」的宜蘭縣輸去、六都以外人口上濟的彰化縣魏明谷m̄是做了誠好嗎,是按怎會輸去?民進黨蘇治芬執政九年、交hō͘李進勇四年,頭尾執政十三年的雲林縣,2009年民進黨的蘇治芬縣長得二十二萬九千九百外票,嬴中國國民黨的吳威志的十二萬一千八百外票,嬴kah有thang好賣,是按怎chit遍民進黨的李進勇顚倒輸中國國民黨的張麗善四萬六千外票?嘉義市長涂醒哲誠認真是按怎會輸去?澎湖縣陳光復m̄是誠拚嗎,是按怎會輸去?   

真濟人第一個反應是中央執政拖累地方選舉。中央執政內底上嚴重的應該是年金改革。年金改革當然正確,以前幾任總統明知重要性,假仙講beh攺革,但是無人敢去做。蔡英文總統認為伊若無做,債留hō͘子孫無應該,伊大膽落去做,一般人民無疼無癢,但是hong改革、人數足濟的軍公教退休人員真食膠,in每個月的收入忽然間減少三分之一當然會疼,chit遍大選報一個猫鼠仔冤。憑良心講蔡英文總統無m̄-tio̍h。第二是民進黨秘書長洪耀福一日到暗teh講戇話:「只要守tiâu高雄tio̍h無輸,若嬴新北,民進黨tio̍h是勝利。」完全無拍算beh嬴台北市-咱的咱首都neh!第三是蔡英文總統政黨政治做無齊全,完全執政完全負責,那會用一寡「老藍男」?真濟為民進黨拚死拚活的支持者真失望。   

咱tio̍h相信,chit遍大選hō͘民進黨一個反省的機會,mā hō͘台灣人民冷靜思考,按呢的選擇tio̍h抑m̄-tio̍h?咱干單會tàng祈求:天佑台灣。 
 
< Prev   Next >