首頁 arrow 綠色短評 arrow 橫霸e5政府你無伊法!

橫霸e5政府你無伊法! PDF Print E-mail
Friday, 22 May 2009

        五月十八(拜一),緬甸反對派領導者翁山舒姬(Aung San Suu Kyi) hong5押去抑光永盛監獄,原本beh秘密審判,因為聯合國、歐盟及東盟各組織e5譴責,緬甸軍政府讓步才特別允准二五名外交官及記者入去旁聽。

        Chitkoh是為啥代?五月初七有二十名緬甸警察進入hong5軟禁e5民主派領導者翁山舒姬佇燕子湖邊所住e5所在。講是因為五月初三暗時,有一位theh觀光護照e5美國人泅水去翁山舒姬e5住所,初五泅水beh離開e5時,hou7秘密警察掠去。聯合國、東協國家、美國國務卿、歐盟特使攏有發表聲明,掠翁山舒姬是一點仔道理都無。無道理?若是照橫霸面e5緬甸軍政府來講,是足有道理咧!緬甸軍政府bat宣佈講,預定beh ti7明年二0一0年舉行二十年來頭一遍選舉,翁山舒姬若是hong5判三年至五年e5徒刑,就無資格參與選舉。

  軍政府那會驚伊驚到chit款?一九八八年翁山舒姬回國照顧破病e5老母,長期執政e5「社會主義綱領黨」頭人吳耐溫將軍落台,緬甸爆發大規模民主遊行,卻遭受tioh8流血鎮壓,新e5軍政府捋權了後,八九年ka7熱心參與政治推行民選制度、四界去演講e5翁山舒姬掠起來軟禁。佇強大國際壓力之下,軍政府ti7一九九0年舉行大選,翁山舒姬領導e5政黨「全國民主聯盟」得tioh8八十幾葩選票e5支持,原本應該由伊來擔任總理組新內閣。不幸e5是軍政府起屁面無beh承認hit遍選舉e5結果。第二年翁山舒姬得tioh8 Nobel和平獎,伊將一百三十萬美金e5獎金交付信託,用佇緬甸人民e5健康及教育頂面。

  一九九五年七月ka7伊放出來,二000年九月koh ka7軟禁,0二年佇聯合國主持e5秘密協商後koh ka7放出來,翁山舒姬講che是「國家新e5黎明」,無疑誤翻轉年五月koh ka7軟禁。根據緬甸e5法律,逮捕令上長只允准會使延長五年,二00八年五月就已經超過拘留期,聯合國批評緬甸對翁山舒姬e5拘留已經違背了in家己e5法律,要求隨時釋放翁山舒姬。

  五月十八旁聽審判e5外交官相信審判結果早就決定了,ti7明年大選進前,無啥可能放翁山舒姬出來。緬甸明年大選,軍政府絕對beh選贏,按呢才會tang3向全世界講軍政e5統治是合法e5。英國國家廣播公司東南亞記者報導講,有可能是緬甸當局對國際社會e5憤怒估傷低,ma7真有可能是受tioh8中國影響。

  翻頭來看台灣,中國國民黨政府及緬甸軍政府仝款橫霸霸,ka7阿扁前總統掠來關爽e5關假e5,一再延長羈押。那會無外國記者寫講:中國國民黨政府對台灣人民e5憤怒估傷低,ma7可能是受tioh8中國影響!(090522)

 
< Prev   Next >