首頁 arrow 綠色短評 arrow 敢是精的出嘴,戇的出手?

敢是精的出嘴,戇的出手? PDF Print E-mail
Written by 李南衡   
Tuesday, 11 December 2018

 十一月二四台灣九合一大選,民進黨輸kah誠悽慘、中國國民黨嬴kahhai-hai。所有的箭攏射向身兼黨主席的蔡英文總統,有檢討有批評有亂罵。若beh罵蔡英文總統,應該問講伊上任chit兩年外做了好抑bái?十二月初五《自由時報》刊登一篇「我是台灣人面冊粉專」所作的一張圖,一秒鐘tio̍h hō͘你看bat蔡政府施政大嬴馬政府,分作五項:第一出口,蔡英文上台了後連續二四紅,馬英九落台的時連續十六烏;第二基本薪資,蔡英文chit兩年半調升3,092元,馬英九hit八年調升2,728元;第三厝價,蔡英文chit兩年半落價,馬英九hit八年起價;第四股市平均量,蔡英文歸年破千億、上萬點歷史上上長,馬英九八年攏佇500700億;第五phāiⁿ債,蔡英文兩年外減少95億,馬英九八年增加1.73兆。Chit\張圖刊出了後,真濟網友攏對小英表示肯定。有人指出「一堆人干單憑感覺罵小英」、有人講「其實我mā m̄知影台灣人到底teh罵啥」、有人講「正確的資訊tio̍h愛定定報出來」,有人講「台灣人無知全球排第三名是假的」。

Chit兩年外中國國民黨敢有做啥hō͘人謳咾的代誌?無。既然無啥作為,是按怎人民會選擇in咧?因為蔡英文總統堅持做年金改革,受損害的軍公教退休kah猶未退休的鬥鬥一下有八十四萬人,平均每一個人減領三分之一的現金,原本一個月有六萬八收入的人變作chhun四萬五,伊那會bē受氣bē火to̍h?上好的辦法tio̍h是chit遍用選票修理民進黨,並m̄是in對中國國民黨有啥物好感。   

按呢講起來,那像攏是「年金改革」害死民進黨?「年金改革」到底應該做抑是無應該做?2013年一月三十日,馬英九總統佇總統府召開記者會,說明咱國年金制度改革第一階段方案,希望佇政府kah國人的共同努力之下,會tàng達成「政府掛保證、安心三十年、疼惜後一代」的目標。伊講咱的年金出現「繳得少、退得早、領得濟」的現象,同時mā產生三大問題:經費不足、行業不平、世代不均;Hō͘年金制度成作國家財政的沉重負擔。咱今仔日無推動改革,軍人退撫基金會tī 2019年破產、教職退撫基金kah勞保基金會tī 2027年破產,公職退撫基金mā會tī 2031年破產,也tio̍h是講後任總統抑是後後任總統,早慢會抵tio̍h ê問題,社會tī chit段期間mā會長期驚惶不安。伊講:「今仔日無做,明仔載tio̍h會後悔!」問題是伊確實無做,有後悔抑無咱m̄知。   

蔡英文總統上任以後tio̍h積極拚年金改革。若無,明年軍人退撫基金tio̍h破產。到時無人會罵舞chit孔烏lang-lang的中國國民黨,會罵破產當時啥人teh作總統。為tio̍h各種年金永續經營,蔡總統才拍拚改革。M̄是精的出嘴,戇的出手!
Last Updated ( Tuesday, 11 December 2018 )
 
< Prev   Next >