首頁 arrow 綠色短評 arrow  台灣,借問你叫作啥物名?

 台灣,借問你叫作啥物名? PDF Print E-mail
Written by 李南衡   
Tuesday, 18 December 2018
十二月十二透早,《自由時報》刊出一篇即時新聞:「台灣是一個國家!」 美國議員講:是承認chit-ê事實的時陣ah!內文講,美國共和黨眾議院外交委員會亞太小組主席約霍(Ted Yoho)昨昏認為,美國政府若是一再配合共產黨,tio̍h是對台灣hông邊緣化做出貢獻,伊強調講「台灣是一個國家,是接受認清chit-ê事實的時陣ah!」約霍昨昏佇英文《台北時報》(Taipei Times)刊出「承認台灣是一個國家」的社論,內底提起美中談判的時,無應該koh再接受中方的條件,因為美方若是同意台灣佇某種程度上是雙方對談的「禁區」的錯誤論述,美國無形中tio̍h是接受中國所主張台灣地位是國內問題的白賊話,煞致使台灣hông邊緣化。伊強調「Chit-má是美國、中國kah全世界其他國家應該公平對待台灣的時陣ah!」台灣以一個主權國家的形式存在,透過人民授權、民主制度、對個人自由kah人權的管理得tio̍h chit款的成績。中共獨裁政府自了m̄-bat統治過台灣。伊提起過去佇共和、民主兩黨高度共識之下,美國國會以壓倒性多數投票通過了《台灣關係法》、保護台灣無受侵略,而且保護台灣事實上的主權、建立一個非官方近四十年的盟友關係。中國一直想beh掩蓋chit-ê事實,因為台灣的存在是對中國執政的威脅。伊強調,2019年是「台灣關係法」四十週年,美國tī chit-ê時間點,應該更新對台政策,hō͘伊符合當前現實情況,按呢做是台、美新關係一個真好的開始,台灣是一個國家,是接受而且承認chit-ê現實旳時陣ah!   

美國有頭殼chiah清楚、有正義感、koh有夠力的政治家為咱台灣講話,咱實在真感謝。問題是美國有一工有影beh承認咱是一個國家,甚至排除萬難決定beh kah咱建立正式的外交關係,一定會問講beh按怎稱呼你?也就是問講beh按怎叫咱的國名?相信國內一定koh是「九嘴十尻川」,有一寡老骨董會講咱的國名叫作「中華民國」。啥物中華民國?伊問講英文按怎叫?應講“Republic of Chian”美國仔問講:China干單一個niā-niā,你是叼位走出來的?中華奧林匹克委員會主席林鴻道會講“Chinese Taipei”漢字寫作「中華台北」,美國人問講是按怎一個國名變作「中國人的台北」咧?那有chit款笑死人的國名!若是問做麵包tio̍h世界金牌的吳寶村,伊會講是「中國台灣」,美國人問講:「是中國抑是台灣?那有人kā兩倨國名排做夥?無人會講國名叫作英國美國。」咱的國應該叫作啥物名?你問一個小學生:「阿文,借問你叫作啥物名?」伊真有可能應你講:「你會曉叫我阿文,那會koh問我叫作啥物名?你那會hiah呢戇呆?」    

仝款,你問講:「台灣,借問你叫作啥物名?」敢m̄驚人笑你戇呆?
 
< Prev   Next >