首頁 arrow 綠色短評 arrow 及猙生beh講啥道理?

及猙生beh講啥道理? PDF Print E-mail
Monday, 01 June 2009
        咱若小可注意,時常會看tioh8狗仔teh路行行一下忽然間小擋恬、夯一枝腳起來漩尿,無管是樹仔、柱仔、壁邊抑是車輪仔,那像是先漩先贏e5款,ma7無管漩濟漩少,那像有漩就好。狗用伊所漩e5尿作記號,表示伊所漩過e5所在攏是伊e5勢力範圍。咱看中國古典小說《西遊記》,孫悟空hit隻猴山仔想講伊已經走到十三天外ah,漩一pu5尿作記號表示伊孫某某來過chia一遊,m7知伊根本走be7出觀音佛祖e5一個手掌。狗及猴攏是猙生才會按呢烏白漩尿。

        有人雖然受過教育、ma7受過文明e5教化,看起來那像是紳士淑女,總是in e5動物性真歹改。前無偌久進前有中國來台灣e5觀光客,佇野柳題字寫伊e5大名某某。Che ma7算是狗漩尿e5一種。

  第二次世界大戰結束了後,有一寡ui3中國轉來台灣e5「半山仔」,就是一寡台灣人因為去中國傷久,已經染tioh8一半唐山人e5習性,但是in雖然靠勢非非亂作,ma7猶知見笑、m7敢講家己是「純種e5中國人」。無管是日本人留落來e5「日產」抑是台灣人e5財產,「半山仔」看合意e5就佇hit間厝宅大門噴漆伊e5姓,表示hit間厝宅是伊e5che ma7算是狗仔烏白漩尿e5一種。

  最近為tioh8台北市景福門頂面e5中國國民黨黨徽是m7tioh8保留落來,引起真大e5爭執。佇公聽會頂面,台北市議員莊瑞雄認為城門ti7一九六六年改建e5時就無應該噴中國國民黨黨徽。一陣人teh爭議hit-e5城門是m7是古蹟?古蹟頂面是m7是會使噴漆黨徽?中央文資委員李乾朗認為應該繼續一九六六年e5時空背景,一旦改變等於無承認古蹟,景福門應該繼續保留黨徽,因為黨徽是ti7景福門指定作古蹟進前就佇頂面ah,古蹟保存是全面e5

另外,因為有莊瑞雄等三位民進黨市議員peh起城門頂頭漆掉中國國民黨黨徽,聽講市政府beh ka7 in移送法辦。管碧玲立委認為,景福門是一個「國民黨破壞古蹟在先,假古蹟漂白成真古蹟在後」e5歷史。Ui3真古蹟變假古蹟,koh ui3假古蹟變真古蹟。若因為一個「假古蹟」beh法辦三位市議員,伊無法度接受。

  Hit-e5城門是m7是古蹟實在無重要,重要e5是早前有一隻狗仔佇hit-e5城門漩尿,表示城門是伊e5。今仔日hit-e5城門beh重噴漆,是m7是一定tioh8 ka7 狗漩過、臭mo-mo e5尿跡koh再重現,永遠hou7e5子子孫孫看tioh8 hit-pu5尿跡,按呢才會tang3表現出當時e5時空背景?

有人及猙生仝款,「褪褲圍海」用號e5,講一個及伊完全無關係e5島嶼是伊神聖領土不可分割e5一部分。借問一下,咱好好人及猙生beh講啥道理?(090529)

 
< Prev   Next >