首頁 arrow 綠色短評 arrow 2018年的柯文哲搧2014年的柯文哲嘴phóe!

2018年的柯文哲搧2014年的柯文哲嘴phóe! PDF Print E-mail
Written by 李南衡   
Wednesday, 26 December 2018

台灣大學政治系舉辦「政治哲學會改變世界嗎?」系列演講,有邀請前政治系教授、也是前行政院長江宜樺2018年十二月十八暗七點去演講,現場限台大政治系本系、輔系抑是雙主修,kah政治所、國發所、公事所等學生參與。演講一半,有成百位學生衝入去會場包圍抗議,大聲喝:「院長下令、警察打人」、「刣人院長、出庭面對」;另外有台大師生出面阻擋抗議學生,場面混亂將近一點鐘,江宜樺最後才狼狽離開。

原來是四年前的2014年日頭花學運期間,民眾kah學生不滿政府回應,三月二三半暝突襲佔領行政院,當時的行政院長江宜樺下令警方採取優勢警力包圍、強行驅離抗議群眾,致使有真濟人遭受警方拍傷流血。當年情景到chit陣群眾獚攏記tiâu-tiâu,特別是hiah-ê台大學生,聽講hit-ê兇手江宜樺轉來台大演講,才會hiah呢受氣。   

江宜樺轉去台灣大學演講一半hō͘台大學生趕出去chit件代誌,除了台灣大學有發表聲明以外,包括馬英九前總統、新北市長朱立倫、立法委員黃國昌在內有真濟閒人講閒仔話。台灣是言論自由的所在,按怎講攏有人贊成、有人反對,beh按怎講攏是伊的自由,獨獨台北市長柯文哲無資格.。     

十二月十八暗,前行政院長江宜樺受邀請轉去台大演講,遭受tio̍h支持日頭花運動的學生圍tiâu leh抗議chit件代誌,第二工,有人問台北市長柯文哲有啥看法?柯市長表示:人門關起來teh上課,tio̍h無應該去閙。伊認為抗議mā tio̍h愛有SOP,「猶原是hit句話,容忍是自由的基礎,但是自由以無侵犯別人的自由作範圍,普世價值佇台灣猶原tio̍h愛落實。」     

柯市長可能bē記得一句俗話話講:「行過的一定會留tio̍h腳跡。」有網友chhōe出柯文哲2014年三月十八佇伊的面冊發表,當時執政的中國國民黨硬宣布服貿協議「已經審查了」,違反人民珍惜的民主價值,人民應該會tàng大聲向政府表達。而且伊有貼家己夯一塊「拒絕服貿闖關」牌仔的相片,以行動支持當時抗議的民眾。網友ge柯市長講:「人門關起來審查服貿,你去鬧啥?」有人ge講:「2018年的柯叫2014年的柯mài吵!」有人喝聲:「柯市長,你真正應該koh倒轉去看當時你家己講過的話,江宜樺佇台大演講hông包圍m̄是無理由。」     

咱是按怎講獨獨柯文哲無資格講閒仔話?因為hit當時伊夯牌仔去「鬧」,m̄知感動偌濟人,支持伊選台北市長。今仔日伊第二任台北市長連任了ah,煞講出chit種話。明明是2018年的柯文哲搧2014年的柯文哲嘴phóe!
 
< Prev   Next >