首頁 arrow 綠色短評 arrow 辛苦的台灣外交官!

辛苦的台灣外交官! PDF Print E-mail
Written by 李南衡   
Thursday, 03 January 2019

  2018年十二月十八下晡六點外,《自由時報》有一條即時新聞講:有台灣民眾最近去德國,佇德國規模上大的法蘭克福國際機場(Frankfurt Airport)發現tio̍h全世界干單有十國的護照會tànghit-ê機場享受快速通關的服務,十國是:澳洲、加拿大、智利、日本、新加坡、南韓、台灣、紐西蘭、阿拉伯聯合大公國美國。德國當局佇告示牌頂頭有印十國的國旗,咱的是中華民國國旗,但是國名足清楚寫作:「台灣」。同時,台灣護照佇德國的慕尼黑機場仝款會tàng享受tio̍h快速通關的服務。

可能猶有人猶m̄知啥物叫作「快速通關」。佇咱外交部、台灣各個國際機場攏會使辦理台灣的快速通關。辦好的護照掀開囥佇櫃台玻璃面頂面,人的目睭看頭前鏡頭“pit”一聲tio̍h好勢會使通關ah!免去kah人排長長的列浪費時間。  

 2018年十二月二一《中央社》報導,有一位ùi德國轉來台灣的齒科醫,佇伊的面冊頂面分享家己享受快速通關的權利,排佇後面的中國旅客mā想beh tòe伊行,煞hō͘海關kā擋lè講:「你che是中國護照,tio̍h排隊。」看起來德國政府真正有kā台灣kah中國分kah真清楚的款式!  

 看tio̍h chit-ê消息,咱第一個反應是:佇國際社會所有的大國攏無承認咱是一個國家,做一個台灣的外交官實在真辛苦!佇德國拼kah beh死的謝志偉干單是一個「代表」,猶bē tang叫作「大使」,實在真受委屈。咱當然足感謝謝志偉「代表」。但是謝志偉真謙卑講,che m̄是他的功勞,伊只不過是一粒小小的螺絲釘,伊干單會曉認真拍拼kā應該做的代誌做好,hō͘德國人ùi中央到地方攏知影、攏感受tio̍h台灣是民主陣營的一份子,獨立koh自由。伊講除了咱政府的努力以外,特別重要的是出國讀冊、旅遊、出差kah做生理的台灣人,長期總體表現得tio̍h德國政府認可,認可「咱chit本是進步、嚴謹的台灣護照,『Taiwan』是值得信賴的,kah『China』有區別。一個是自由民主,一個是專制獨裁。」   

Che hō͘咱想起前駐日代表許世楷。2005年八月,日本參眾兩院先後通過hō͘台灣免簽證待遇,經過日本內閣會議通過,日本成作hō͘台灣免簽證待遇的第一個主要大國。許代表拚kah大粒汗細粒汗,伊一點仔都無討功勞,客氣講是咱全體台灣人的好表現。當時中國駐日本大使聽tio̍h chit-ê消息,去日本外務省吵講中國人mā beh愛免簽證待遇。日本外務省官員干單應講:「台灣人是所有外國遊客上界守規矩的。」足無守規矩的中國人的大使鼻仔摸一下無話講離開。上bē見笑的是馬英九總統講he是伊的政績。伊完全m̄知影台灣外交官是偌呢辛苦!
Last Updated ( Thursday, 03 January 2019 )
 
< Prev   Next >