首頁 arrow 綠色短評 arrow 蔡英文轉來ah!

蔡英文轉來ah! PDF Print E-mail
Written by 李南衡   
Thursday, 17 January 2019

一月初四,綠黨桃園市議員王浩宇佇伊的面冊頂面,貼一張勢面曲線圖,講「蔡英文轉來ah!」小可hông驚一tiô,想起來蔡英文總統最近tang時出國,昨昏抑是今仔日才「轉來」。詳細一下看,才知影王浩宇是講,蔡英文總統連續以「兩個不接受」、「是啥人講的tio̍h算數」強硬反擊「習五點」kah「四大老」了後,一夜之間「支持」的聲浪大量溢來。王浩宇議員佇伊貼的勢面曲線圖講「政治的變化,實在是太不可思議。」伊貼的圖頂面有總統蔡英文、台北市長柯文哲、高雄市長韓國瑜的相片,藍色是韓國瑜、綠色是柯文哲、柑仔色是蔡英文。圖表ùi 2018年十二月初五做起,,柯文哲上懸有三十五萬,續落去落落(lak-lo̍h)來十萬kah二十萬中間,第二懸的韓國瑜有十三萬,續落去攏佇十萬二十萬中間,尾仔名的蔡英文十一萬,續落去落落來五、六萬到十萬。真特別的是今年正月初五,柯文哲十二萬、韓國瑜七萬、蔡英文ùi五萬跳起去二十萬。王浩宇講的是「網路聲量」、「網路搜尋熱度」有強烈teh giú懸。蔡英文回應講:「我chit-má teh做的tio̍h是一個總統應該做的代誌。」

蔡英文總統chit句話講了足tio̍h足好!台灣人tio̍h是希望蔡總統不管時攏會tàng按呢。高齡一0一歲的「台獨o-jí-sán」史明先生,tio̍h一再提醒蔡英文總統「M̄-thang bē記得上起初的願望」,伊講蔡英文總統chit-má猶會赴重新行轉來大眾路線,每一個政策若攏會tàng想tio̍h百姓的利益kah福祉,按呢tio̍h會tàng重新嬴回民意。  

 照史明先生的講法,是講蔡英文總統有時陣mā會「bē記得上起初的願望」,史明先生真客氣無講破是啥。佇幾件代誌中間,咱至少應該講其中一件hō͘蔡英文總統知影,「東奧正名」chit件代誌伊做了真大真大的差錯。2018年九月十八,民進黨中常會通過選對會討論案,決議「民進黨各級黨公職kah候選人『不應參加kah參與動員』十月二十的群眾聚會」。而且若有去參加的人,tio̍h寫報告作交待。Chit種作法,離台灣人的心傷過遠,害真濟會使講是幾年來一直是民進黨kah蔡英文總統「死忠兼換帖」的支持者,一時跋落去傷心、失望kah憤怒的深坑,2018年十一月二四hit工根本peh bē起來去投票。作一個總統可能無適合去參與「東奧正名」運動,伊會使tèⁿ恬恬,但是作一個民進黨主席去發hit號命令實在誠無適當,大大鑿疼tio̍h真濟希望台灣正名的台灣人的心!   

聽講「蔡英文轉來ah!」咱歡喜的m̄是干單伊的聲望轉來niā-niā,咱koh khah期待的是伊的心神、伊歸的人,攏轉來佇台灣人的中間!
 
< Prev   Next >