首頁 arrow 綠色短評 arrow 台灣m7是初十二五才「無理法」!

台灣m7是初十二五才「無理法」! PDF Print E-mail
Monday, 08 June 2009
        中國文化大革命鬧煞,審判四人幫e5畫面佇電視播出e5時,hou7我印象上深e5是四人幫之一e5張春橋。伊確實是一個人才,伊徹底了解啥物叫作「政治鬥爭」,我有勢e5時我講啥物就是啥物,今仔日換你捋權,behbeh刮隨在你,法律只不過是政治鬥爭e5工具而已,beh判啥物罪恁早早就決定了ah。所以無管法官問啥物話,伊攏準作無聽tioh8,根本無愛插伊。路尾法官問伊:「張春橋你那會無愛講話?」伊原在不動如山,連ka7法官眼一下都無。

        親像阿扁前總統chit款讀法律e5人,往往會變作「書呆」,相信法律決定一切,佇法律頭前人人平等。伊若生佇真正民主自由、有影司法獨立e5國家,按呢想當然無m7 tioh8。真不幸伊生活佇一個司法無獨立e5所在,司法並m7是親像伊所讀、所想e5天平hiah呢公正、無偏、無私。那像中國國民黨一個大官所講e5:「法院是咱兜開e5!」佇中國國民黨統治下,法律那像「麻薯手內出,隨在伊捏。」致使法律佇台灣定定成作政治鬥爭e5工具,造成司法不公。台灣e5法律若確實公正無私,那會使ka7抽籤決定e5審判長法官換掉,只因為伊認為無應該繼續收押阿扁前總統,就緊換一個主張收押e5法官。阿扁前總統一直到hong5收押超過一百二九工koh再追加罪名繼續ka7收押,到hit陣阿扁前總統才看出,原來che是離司法公正真遙遠e5一齣馬戲,伊才決定無愛koh繼續演落去,hiahe5ma7算是後知後覺。

  六月初二台北地方法院開庭審理扁案,阿扁前總統以恬恬回應追加起訴犯罪事實。伊用「不認罪、不答辯、不傳證、不詰問,無犯罪」來回應法官e5問話。

因為阿扁前總統已經ti7五月二一當庭解除三位律師e5委任,ma7放棄及撤回所有證人e5傳喚。所以法院tioh8派兩名公設辯護人替阿扁前總統辯護。審判長蔡守訓問阿扁前總統二十八擺e5話,阿扁前總統攏無應聲。

  咱台灣俗語話講:「聖筶無兩個poah8 be7 tang5。」既然阿扁前總統決定無beh koh演馬戲,用「四不一無」來回應審判長,雖然有公設辯護人,事實上chit齣馬戲是演be7落去ah

  Ui3法院e5角度來看,阿扁前總統實在真假saiu2!原本beh去美國讀冊、阿扁前總統e5查某子、及扁案攏無牽連e5陳幸妤,第二工六月初三,特偵組就ka7伊列作扁案中有作偽證e5嫌疑犯。台灣就是會發生chiah拄好e5代誌。

  每個月初十二五是台灣理髮業e5公休日,所以台灣有一句歇後語「初十二五,無理髮。」M7tang時仔,台灣變作逐工都「無理法」!(090605)

 
< Prev   Next >