首頁 arrow 綠色短評 arrow  看伊柯P目睭金金‧‧‧

 看伊柯P目睭金金‧‧‧ PDF Print E-mail
Written by 李南衡   
Wednesday, 30 January 2019

 一月十九《自由時報》報導,一月十六,中國軍委聯合參謀部參謀長李作成kah美國海軍軍令部長理察生會面的時,李作成講台灣問題屬中國的內政,關係tio̍h中國的核心利益kah中國民族情感,無容允外來勢力干涉。李作成當面美國唱聲講,若有人beh kā台灣ùi中國分裂出去,中國軍隊會無惜任何代價捍衛領土完整。對chiah-ê話,一月十七美國國防部回應講,美國堅守《台灣關係法》對台灣的承諾,堅定支持台灣的自我防衛能力,同時美國會抵抗任何可能危害台灣的威脅。

1949年中華人民共和國建國以來,台灣kah中國m̄-bat合過,是beh按怎分裂出去咧?台灣kah中國明明是兩個獨立的個體一點仔牽連都無,中國民族情感烏白豐富創啥?明明m̄是中國ê,硬講beh愛beh搶,che m̄是強盜、無是啥?  

一月十九暗時八點半《中央社》即時新聞報導:針對中國國家主席習近平幾工前發表對台談話,德國外交部長馬斯(Heiko Maas)佇國會答詢的時表示,無法度接受中國武力威脅台灣的作法,伊會向中國清楚表達德國的立場。   其實中國耀武揚威,不管時講無beh放棄武力侵佔台灣,kah德國一點仔關係都無,che完全是第三者看bē做得、發出的「正義之聲」。  

 一月十八暗播出的台灣電視專訪中,台北市長柯文哲講到美中台關係的時,主持人問講,親美派的民進黨陣營傾向kah美國的關係khah好,是m̄是有機會kā台灣hông限縮的空間giú khah大?柯市長竟然提出「強盜說」,伊講一個比喻,講親美立場的蔡政府向美國爭取資源,那像teh搶銀行,干單看tio̍h錢,卻無看tio̍h邊仔徛tio̍h的警察-中國。   

古早秦始皇二世的丞(sêng)相趙高想beh篡(chhoàn)位,先beh試看大臣中間有偌濟人支持伊、有啥人反對伊。伊牽一隻鹿來獻hō͘秦二世講是千里馬。秦二世講he是鹿、m̄是馬。趙高講咱來問眾大臣是鹿抑是馬。有正義感但是無膽的攏恬恬m̄敢出聲,有幾個khah好膽的大聲講:「鹿」,趙高一個一個kā記tio̍h、事後才kā in治罪,gâu看風勢的緊大聲喝講:「千里馬」。後來chit-ê代誌變作一句成語「指鹿為馬」,是講thiau故意顚倒是非的人。Chit-ê故事傳去日本了後干單留「馬鹿」兩字落來,日本話讀作「bá-kah」,意思是戇人。  

 柯P是典型的「指鹿為馬」,家己講智商(IQ)175的柯P無可能承認家己是「bá-kah」。但是伊那會kā chiah善良的台灣比喻作強盜,顚倒kā hiah呢邪惡的中國比喻作維持治安的警察?唯一的可能是:看伊柯P目睭金金,人傷重! 
 
< Prev   Next >